شد وجذب

إيه الحكاية يا مصر

ولىد عبدالعزىز
ايه اللي بيحصل في مصر.. هو انتم شايفين اللي انا شايفة.. يتم تثبيت مساعد وزير الداخلية في وضح النهار وتتم سرقة سيارته بالاكراه.. ضباط الشرطة يقتلون كل يوم اثناء تأدية واجبهم.. وضباط شرطة مخطوفون منذ 25 يناير 2011.. وجنود الجيش يقتلون وهم صائمون علي الحدود.. واخيرا وليس آخرا يتم اختطاف 7 جنود من الجيش والشرطة في سيناء.. والادهي انه يتم التفاوض مع الخاطفين.. يانهار اسود.. هي ديه مصر بجد وله انا وانتم بنحلم.. طب لما بيحصل كده مع حماة الوطن يبقي هيحصل ايه في المواطن العادي..نسيت اقولكم ده لسه ما عرفوش مين اللي حرق اتحاد الكرة ونادي الشرطة.. واكيد مش هيعرفوا مين اللي اقتحم مؤتمر وزير الرياضة وكسر وحرق ومشي ومحدش قال له انت مين.. عارفين ليه بجد.. عشان الشعب مش مصدق ان في حكومة ولا بقي يخاف.. من سنتين وانا عمال اكتب في المكان ده واقول يا جماعة الخير مصر بتضيع ومحدش عايز يعترف وقلت ان البلد من غير أمن عليها العوض وطالبت بتخصيص نصف ميزانية مصر لاعادة الامن.. والنبي بدل ما احنا شاغلين الناس بقانون القضاء ومحور قناة السويس وقرض الصندوق ومحصول القمح وانقطاع الكهرباء ما تيجو نعترف بحقيقة الوضع المنيل اللي احنا عايشين فيه.. هو احنا ليه مش عايزين نصدق ان البلد لو غرقت هتغرق بينا كلنا ومش (هينجي) الا اللي معاه فلوس كتير عشان هيخدها ويهرب.. والله العظيم مصر بتضيع ولو سقطت لا هينفع معاها لا اخوان ولا ليبراليين.. تعالوا نتحد بجد ونلحق البلد ونبعد عن الاطماع والمصالح الشخصية شوية.. اللهم احفظ مصر من ابنائها واعدائها واعد الامان المفقود اليها يارب العالمين.. امين امين امين.