صلاة لمصر الحزينة

النار.. في قلبه.. النار
وف قلبك أنتي النور
قلبك يا مصر عمار
وقلبه هو بور
استحملي المشوار
وكملي المشوار
خطي العتب خطي
عدي البحور عدي
مدي الخطي مدي
شدة وحتعدي
وياريح ليالي الشوق
إديها من قوتك
ويا نجمة عالية فوق
إديها من عزتك
ويا بحر نيل يا قديم
إديها من حكمتك
ويا بحر نيل يا حكيم
إديها من سرك
ويا شجرة الصفصاف
إديها من طهرك
ويا أرض لسه جفاف
إديها من صبرك
ويارب يا موجود
في العود وفي العنقود
في الأم والمولود
في الغيب وفي الحاضر
يارب يا قادر
شيل من عنيها الغما
وافتح ببان السما
يارب يا موجود
في الوعد والمكتوب
في الحب والمحبوب
يا منجد الملهوف
شيل من فؤادي الخوف
واديها قدرة تشوف
بالقلب ويا العين
تعرف طريقها فين
واحفظها م الحاسدين
آمين
آمين
آمين