مشاركون على صفحة الحكومة لعيسوي: إصلاح الداخلية مش ب"بادج" الضابط بل ب"الاحترام"

تباينت ردود أفعال المشتركين فى الصفحة الرسمية لرئاسة مجلس الوزراء، حول التكليفات التى أصدرها منصور عيسوى، وزير الداخلية، اليوم الجمعة لرجال الشرطة بوضع "بادج" بتضمن الاسم والرتبة مع إظهار الهوية للمواطن، وأنه على كافة القيادات الشرطية الالتزام بسيادة القانون ومراعاة قواعد العدالة والمساواة لكل المواطنين، مع تطوير وتحديث سيارات الترحيلات بشكل سريع بما يكفل احترام آدمية وحقوق المتهمين.
كما تباينت ردود الأفعال أيضاً حول توجيهات عيسوى لقطاع التفتيش والرقابة بالوزارة بالمرور والتفتيش الدائم والمفاجئ على المواقع الشرطية كافة، والتصدي الحاسم لأي تجاوز أو خروج على الشرعية وسيادة القانون وانتهاك حقوق الإنسان.
كتب حسن مشالى، أحد المشاركين بالصفحة، تعليقاً على تكليف وزير الداخلية قائلا: "هوا يا سيادة رئيس الوزراء إنتا متعرفش إن غفر بلدنا بيخرجوا لعملهم من الساعة 12 بالليل، ويروحوا بعدها ب 3 ساعات علشان وراهم سرحة يشتغلوها ولا إيه؟ الناس بتشتغل 3 ساعات بس عايز أعرف ليه بيقبضوا شهري المفروض يقبضوا بالساعة".
أسفل منه مباشرة كتب عاطف ياسر: "ياريت بعد الثقة والتجديد للسيد الوزير إنه ينزل كل مكان بنفسه زى الوزير العظيم أحمد رشدى كان وزير مكتبه الشارع مش الوزارة وكان طبعه العدل والقوة فى القرارات مش اللين أو الضعف".
تطرق مشارك آخر وهو أحمد زايد إلى الكتابة فى اتجاه آخر، ولكن تعليقاً على نفس الخبر قائلا: إذا كنت مسلم أو كنت مسيحي.. فأنت مصري، وإذا كنت بتحب مبارك وبتأيده أو لو كنت بتكرهه.. فأنت مصري، وإذا كنت مع الثورة وأهدافها أو لو كنت ضدها.. فأنت مصري، وإذا كنت إخوانى أو سلفي أو حتى حزب وطنى.. فأنت مصري، وإذا كنت علمانى أو ليبرالي أو ناصري أو يسارى.. فأنت مصري، لأن البلد دى بلدنا كلنا، وكلنا مسئولين عنها، وواجبنا إننا نحافظ عليها ونحميها من أى خطر.. تعالو كلنا ننسى خلافتنا ولو لوقت قصير بس ونفتكر بس حبنا للأرض اللى اتولدنا واتربينا عليها وهنندفن فيها.. ونتوحد كلنا تحت علم مصر وراء جيش مصر العظيم. ضد كل المحاولات التى تهدف للنيل من أمن واستقرار بلدنا. ضد كل من يحاول أن يفرق مابين صفوفنا علشان نبقى أضعف.. ولو أنت فعلا بتحب مصر، إعمل حاجة علشان مصر".
بينما عاد محمد سليمان للتعليق على خبر تكليفات عيسوى بقوله: "خطوة جميلة بس يارب تتم بضمير مش بمجاملات لأي فرد من أفراد الأمن". فردت عليه كريستين فوزى بتساؤل: طيب وليه ما يقومش بده منظمات حقوق الانسان أصلا؟ يعني على الأقل هي تعرف فى حقوق الإنسان لأن الداخلية متعرفش أصلاً يعني إيه إنسان".
وبابتسامة طويلة كتب سامى فورزى قائلا: "هههههههههههه وزارة الداخلية بتفتش علي وزارة الداخلية.. دي أغنية حمادة هلال الجديدة".
بينما علّق حمادة المنشاوى قائلا: "تمام كدة يا فندم وربنا معاكم دايما يارب، والحفاظ على كرامة المواطن المصرى داخل أقسام الشرطة، وياريت تعين أخصائى اجتماعى لتحرير محاضر الشرطة فى الأقسام بدلا من أمناء الشرطة اللى كانوا بيقبضوا من الشاكى والمشكو فى حقه وتحيا مصر حرة".
ووضع شريف يونان سيناريو التفتيش داخل أقسام الشرطة من خلال التعليق الذى جاء فيه: "محمد باشا من لجنة التفتيش هيروح لمحمود باشا زميل دراسته واللى بيتفتش عليه.. يشربوا شاى مع بعض ويفتكروا أيام الدراسة الحلوة وبعدين يروح كل واحد بيته".
أما محمود كمال فكتب معلقاً: "كلام جميل وكلام معقول لكن عايزين نشوف معاملة جميلة من الشرطة، أنا من العريش كنت زمان بسافر بالعربية فبلاقي نقاط التفتيش ولا أعرف كيف أعطي رشاوي كغيري، والحمد لله الآن بلاقي رجال الشرطة قاعدين مش فاهم ليه، بدون شغل، ولكن بجد رجال الجيش حاجة تفرح بجد ربنا يحميهم ويبارك فيهم، في نقاط التفتيش".