"أنا مش عارفنى" صرخة ضد مصور البطاقات لإنه مطلّع نص الشعب عاهات

"لو زهقان من شكلك في البطاقة وحاسس إن الصورة طلّعت واحد تاني خالص، انضم لينا عشان نعمل وقفة ضد كمبيوتر الداخلية اللي بيطلّع المصريين كلهم مسجلين خطر في البطاقة" هكذا جاءت افتتاحية إحدى الصفحات التي دشّنها أعضاء موقع التواصل الاجتماعي "فيس بوك" تحت اسم "حملة إقالة الراجل اللي بيصور في السجل المدني عشان مطلّع نص الشعب عاهات" حيث انضم للصفحة أكثر من 27 ألف شخص خلال أيام معدودة.
استخدم الأعضاء الصفحة كوسيلة للتعبير عن غضبهم من مصور السجل المدني، حيث يرى البعض أن صورته في البطاقة لا تختلف كثيرا عن المسجلين خطرا بينما رأى أخر أن صورته لا تختلف عن صورة حبيب العادلي وأنه قد يعدم قريبا هو الأخر، بينما أجزم أحد الأعضاء أن صورته في البطاقة هي نسخة طبق الأصل من صورة "حسب الله" زوج شخصية سكينة في "ريا وسكينة".
وبالغ أعضاء الصفحة في تصعيد سقف مطالبهم لدرجة أنهم طالبوا بإعدام "الراجل اللي بيصور في السجل المدني" وليس فقط الإقالة ورصدنا بعض التعليقات في الصفحة.
فذكرت منى فوزي: أن سيدة هي التي قامت بتصوريها والواضح انها كانت مستعجله ووراها طبيخ، بينما رفع رامي أمين الحرج عن "الراجل اللي بيصور في السجل المدني" قائلا: "هههههه طب الراجل ذنبه إيه بس ؟ الكاميرا فيها مشكلة؟"
أما إيمي محمد فقد ناشدت أعضاء الصفحة بسرعة إعدام "الراجل اللي بيصور في السجل المدني" لأنها كل مرة تنظر إلى بطاقتها تجد نفسها في حالة طرب مستمر مع أغنية "أنا مش عارفنى أنا تهت منى انا مش اناااااااا حرااااااااام".
سلمى محمد أخدت في وصف مدى قبح صورتها في البطاقة قائلة: "تحس إن صورة بطاقتي من ضمن صور خرج ولم يعد من السرايا الييلوو "الصفراء "، ضحكتي بلهاء وتبريقتي أعجب من تبريقة شيريهان في الفوازير.. أه وربنا."
"الراجل ده لازم يتعدم.. ده مطلعني بتاع بطاطا" لم يجد الخطيب أقل من الإعدام كي يشفي غليله من "الراجل اللي بيصور في السجل المدني" وتضامنت معه إيمان سامي التي أكدت: " أنا عندى 21 سنة ورافضة رفض تام أعمل البطاقة بسبب الراجل ده حققتو أمنيتى، ودعا شادي محمد أن تنجز هذه المهمة بأسرع وقت قبل ميعاد تجديد البطاقة وقال:"يارب ينجز ويكون اتغيّر عشان ما أخدش نفس البشلة تاني"
يارا سامي تؤكد بما لا يدع مجالا للشك : أنا بقيت نسخة من "الكبيرة" اللي في فيلم كتكوت"، وكل ذلك بسبب "الراجل اللي بيصور في السجل المدني" فهو نفسه الذي جعل شقيق زينب الشيخ يسألها في كل مرة يرى بطاقتها: إنتى موتى كام مرة قبل كدة؟!
محمد حلمي كان أكثر إيجابية من باقي الأعضاء وقرر أن يُقدّم اقتراحا لحل مشكلة صورة البطاقة الشخصية فقال:
"أنا بطالب إن كل واحد يعمل بطاقة يختار الصورة اللى تعجبوا.. بمعنى إن هيئة السجل المدنى تعمل أكاونت على فيس بوك وتضيف مصر كلها عندها، واحنا نحطّ الصور اللى تعجبنا على الفيس وهما ياخدوها ويعملوا بيها البطايق.. والله الموفق" .
أحمد شمس رأى بعدا أخر للموضوع ويعتقد أن هناك مؤامرة ما قائلا: "دا مش راجل واحد.. دى شبكة تهدف إلى تشويه (صور) مصر"
وترى أميرة أنه يجب على أي فتاة عاقلة ناضجة تسعى للهروب من شبح العنوسة إنها: لازم تخبّي صورتك في كتب الكتاب وادّى المأزون خمسين جنيه عشان ميوريش البطاقة للعريس ههههههههه" .
واختلفت " ياسمين أحمد" مع المشاركين في الصفحة وقالت : لا أنا مختلفة معاكو في حكاية بيطلعونا عاهات أو مسجلين خطر أو ابحث مع الشرطة، طب ياريت نكون كدا، دا إنتو كدا كرمتونا، أحسن وصف بصراحة للصورة هي :هربانين من حديقه الحيووووووووووووووان .
وتستمر صيحات أصحاب الصفحة تتعالى مطالبه بإقالة الراجل اللي بيصور في السجل المدني فهل من مجيب؟.. وهل كان "الراجل اللي بيصور في السجل المدني" جزء من الثورة المضادة؟