6 إبريل : العنف لا يمثل الثورة .. و"الإخوان" من بدأوه.. ونحذر من تحول البلاد إلى "غابة"

استنكرت حركة شباب 6 إبريل التى أسسها أحمد ماهر العنف الذي استخدمه بعض المعارضين لجماعة الإخوان المسلمين أمس فى جمعة رد الكرامة، من طوب ومولوتوف وحرق مقار الجماعة، مؤكدة أن تلك الطرق لا تمثل الثورة، محذرة من أن إتيان الحق بالذراع، سيحول البلاد إلى "غابة"، على حد قولها.
وقالت الحركة فى تدوينة لها مساء أمس الجمعة عبر صفحتها الرسمية على فيسبوك " الثورة مش طوب ولامولوتوف ولا حرق مقرات، ومطالبتنا بالحق مش إننا ناخده بدراعنا وإلا تبقى غابة(لو كنت إخوان هيعجبك الكلام دا أوى وهتقول علينا أحسن ناس ولو مش إخوان هتقول علينا عملا وخونة وقبضنا من الإخوان أو إخوان متنكرين)".
كما أدانت الحركة أسلوب جماعة الإخوان المسلمين في التعامل مع المعارضين، وتكفير كل من يخالفهم الرأى ، لافتة إلى كون الجماعة هى التى بدأت باستخدام العنف مع معارضيها، مضيفة " للإخوان ..أنتم اللى ابتديتوا بالعنف والبلطجة ونزلتوا تموتوا الناس عند الاتحادية، ورئيسكم وفشلكم ومدى جهلكم وعجزكم هو السبب فى كل اللى بيحصل(لو إنت إخوان هتشتمنا وتقول علينا برده خونة وعملا وبنخرب البلد وأعداء للدين ولو إنت مش إخوان هتسقف لنا وتقول علينا أحسن ناس)".
وشددت الحركة على أنها لن تجامل أو تنافق أى فصيل من الفصائل السياسية، و ستقف على الحياد، وستقول الحقيقة التي تراها، مهما كلفها الأمر، واختتمت تدوينتها مضيفة "نقطة مهمة..الحياة مش أبيض وأسود ومن ليس معى فهو ضدى، مش معنى إنك تقول إن الطرفين غلط فى موقف معين إنك على الحياد، إحنا مش على الحياد لأننا مصريون ولينا مصلحة فى البلد دى وعاوزينها تبقى أحسن بلد".