وآخرتها أنا والمدام والمخلوع

إمبارح خرجت مع المدام والأولاد في توديع أماكن أحببتها جداً في الرياض ، قبل رجوعي من السعودية واستقراري بمصر بمشيئة الله.
لجين وهيا كانوا بيلعبوا ..والمدام بتأكل أيس كريم وفجاة قالت لي :
كل اللي بيجي ع المخلوع بيألمه أوووي ؟
قلت لها : مين يجي ع المخلوع ..الراجل آكل شارب نايم قايم صابغ شعره وواخد حمام السونة بتاعه ، مستريح في سجن مزرعة طره تالت ومتلت ؟
ردت المدام بقرف: سجن ايه وطره ايه : أنا باتكلم عن الأيس كريم ؟
رديت باندهاش زوزو : وإيه جاب الأيس كريم للمخلوع ..هتفتروا على الراجل ؟ الأيس كريم ومبارك دونت ميكس؟
بصت لي المدام بتململ وقالت: يا أخي أفهم بقى، الأيس كريم كل لما يجي على ضرس العقل المخلوع بيألمه ويألمني أووووي ؟
رديت ببلاهة: آه مش تقولي كده م الأول يا أم لوجي ..بس الأيس كريم أنا جبته من شوية ..لكن العقل مين جابه وأمتى؟
قذفتني بما أمامها من مناديل ورقية وقالت : أهوه طار خلاص!
ومن ساعتها بحاول أفتكر اسم المكان اللي زرناه إمبارح بس ..بصراحة مش فاكر .