هذا رأيي

أنا اللي معايا الختم‏!‏

خلصنا من الراجل اللي واقف ورا عمر سليمان‏,‏ طلع لنا الراجل اللي واقف ورا يوسف القرضاوي‏..!‏ الراجل اللي شايله الشمسية في جمعة الانتصار والاحتفال بقي عضو مجلس أمناء الثورة‏,‏ والراجل اللي ماسك له الميكروفون بقي شيخ مشايخ المليونية‏. ,‏ وواحد معدي والقناة الأولي بتصور‏,‏ صار متحدثا رسميا‏,‏ يطالب وينذر ويهدد‏,‏ ويتحدث باسم الشعب علي الهواء مباشرة‏,‏ وصحفي انتهازي منحط المفردات والسلوك‏,‏ صار بطلا قوميا ينتظر وضع صورته بجوار اسمه في لوحة الشرف‏,‏ لمجرد أنه يسب رئيس تحرير جريدة قومية‏,‏ علي سبيل تصفية الحسابات القديمة‏.‏
‏..‏ كل هذا ودم الشهداء الذين يتاجرون به لم يجف‏,‏ بعضهم مازال في ثلاجات المستشفيات ولم يسلم لذويه‏,‏ وبعضهم لم يمض علي جنازته أسبوع‏(‏ أومال علي الأربعين هاتعملوا إيه؟؟‏)‏ كلما رأيتهم في التليفزيون‏,‏ قلت لنفسي‏:‏
الفيلم ده أنا دخلته قبل كده‏!‏
أتذكر الناصر صلاح الدين و‏(‏الراجل اللي واقف ورا ريتشارد قلب الأسد‏)..‏ أطلق عليه السهم المسموم‏,‏ وبعدها كان أول من يقف أمام خيمته يصرخ في الجموع‏(‏ دم ريتشارد لن يضيع‏..).‏
وأتذكر مسرحية حسن عابدين‏(‏ شفيق ياراجل‏),‏ كلما ظهر الأستاذ‏(‏ أمين ثوري عضو ائتلافي‏)‏ قائلا في بجاحة‏:‏ ها أنا ذا‏..‏
تتساءل في نفسك أو تسأله‏:‏ وحضرتك تبقي مين بقي يا عم الائتلافي؟ وما هو دورك أصلا في الثورة؟
فيجيبك علي طريقة‏(‏ شفيق ياراجل‏):‏ عارف اللي كان ماسك العلم في ميدان التحرير؟ عارف اللي كان بيهتف‏(‏ الشعب يريد إسقاط النظام‏)‏؟ طب فاكر اللي كان معلق يافطة‏(‏ يسقط يسقط حسني مبارك‏)‏؟ طب شوفت اللي كان بيطبل بعد خطاب التنحي وبيغني‏(‏ يا جمال قول الحق بابي حرامي ولا لأ‏)‏؟‏!‏
ستقول له ببساطة مصر كلها كانت في ميدان التحرير‏,‏ ومليون واحد كانوا بيغنوا وبيهتفوا وماسكين علم مصر‏,‏ من كنت فيهم حضرتك؟
فيرد بكل برود‏:‏ ما همة دول بقي اللي كانوا معايا يومها‏!!‏
ياشباب‏(‏ الائتلاف‏)‏ المخلصين‏,‏ ويا مجلس الأمناء الثوريين‏,‏ يا كل من أعطي لنفسه بدون مناسبة حق الكلام باسم الملايين‏,‏ يا أيها المتكسبون بدم الضحايا والشهداء‏:‏ حيلكم حيلكم‏..‏ إن كان علي الدعاية كلنا ولامؤاخذة بنطلع في التليفزيون‏,‏ ولو علي البيانات‏,‏ احنا أحسن من يكتب ويوقع بالنيابة عن الجميع‏,‏ و‏(‏الائتلاف‏)‏ احنا اللي بدعناه‏,‏ والشماسي مفيش أكتر منها‏,‏ سمعني سلام‏:‏ دقوا الشماسي‏,‏ ووحياة قلبي وأفراحه‏,‏ واللي يحبنا مايضربش نار‏.‏