تذكرة سينما مع ماجدة زكي‏

لا اعرف ان كان من حسن الحظ ام من سوء الاحوال الجوية‏,‏ اني كنت بأرتعد من البرد وانا ادير هذا الحوارمع ماجدة زكي علي مائدة مشتركة في نادي الصيد حتي الواحدة بعد منتصف الليل تقريبا. الصباح كان متربا وحارا فلم احسب حسابا للتقلبات الجوية‏,‏ ونسيت يومها اننا لم نغادر الشتاء بعد‏,‏ فتجرأت علي بلوزة صيفية خفيفة فكرت ان لونها الاحمر القاني غالبا سيعجب ماجدة‏,‏ فهي اقرب ما تكون لشكل البلوزة الموف التي كانت ترتديها‏,‏ يوم رأيتها اول مرة‏-‏ وجها لوجه‏-‏ في مبني التليفزيون‏...‏
لكن ما دخل حوارنا الصحفي ببلوزتي وبلوزتها ؟ لم اعرف الاجابة الا بعد ان انتهي هذا اللقاء‏...!‏
‏..‏ بعد اقل من خمس دقائق علي شرب العصير في النادي‏,‏ بدأ الحوار تلقائيا‏,‏ وقالت ماجدة وهي تفتش حقيبة يدها باهتمام‏:‏ استني كدة اما اشوف‏...‏ باين نسيت الموبايل بتاعي‏..‏ عندي معاد مهم و الناس ها يطلبوني و يتهيأ لهم اني مش عايزة ارد
‏*‏ سألتها‏:‏ الموبايل اللي معاكي ده ايه ؟
‏**‏ لا انا بتكلم علي الموبايل التاني اصل عندي‏3‏ نمر و كل نمرة لها موبايل
‏*‏ طب ليه العذاب ده ما تجيبي الموبايل اللي فيه شريحتين بنمرتين
‏**‏ والله‏..‏ نمرتين في موبايل واحد ؟
‏-‏ ده عادي و منتشر جدا‏..‏ جوزي عنده واحد‏..‏ ابقي اسألك عن ماركته
‏-‏ ياريت‏,‏ ده انا مرة سافرت العمرة وغيرت الشريحة في الموبايل ونسيت خالص ان في معاد مع شركة مهمة كنت متفقة معاها اعمل لهم اعلان‏,‏ واتاريهم بيتصلوا بي وانا ولا في بالي‏,‏ لحد ما رجعت مصر و عرفت ان الاعلان راح لفنانة تانية‏,‏ قلت سبحان الله‏,‏ نصيب وكل واحد له رزقه‏.‏
‏*‏ سألتها‏:‏ و عملتي ايه في الاعلان الاخير الذي عرضته عليك احدي الشركات المعروفة ؟
‏**‏ مش عارفة‏..‏ لسة بافكر وبسأل اصحابي خاصة من لهم خبرة سابقة في الاعلانات
‏*‏ هل التردد من صفات برج الاسد ؟
‏-‏ انا برج القوس‏25‏ نوفمبر
‏*‏ لكني قرأت لك تاريخ ميلاد مخالفا علي النت و بالتالي كتبوا أنك من برج الاسد‏,‏ حتي بالامارة لك صورة جميلة علي النت و انتي تحملين صورة اشرف زكي في دعاية انتخابات نقابة الممثلين و بجانبك زوجته الفنانة روجينا‏..‏
‏**‏ تهلل وجهها بابتسامة واسعة طيبة وقالت‏:‏ اشرف اخويا حبيبي‏...‏
‏-‏ ثم تجهمت قليلا وهي تقول‏:‏ روجينا‏..‏ انا متصورة مع روجينا ؟ فين ده ؟
‏*‏ علي النت و الله‏..‏ اكتبي الفنانة ماجدة زكي علي‏(‏ جوجل‏)‏ و ادخلي وشوفي
‏**‏ طب لحظة واحدة‏(‏ اتصلت بالموبايل‏)‏ الو يا حبيبة‏,‏ افتحي الكومبيوتر و اكتبي ماجدة زكي علي‏.........(‏ تنظر نحوي كأنما تتذكر‏)*‏ علي جوجل
‏**‏ ايوة علي جوجل‏,‏ وشوفي كده يا حبيبتي‏...‏ اه عايزين نصحح المعلومات المكتوبة عني‏,‏ طب يا حبيبتي‏..‏ صح‏..‏ خلاص‏..‏ نعمل موقع‏..‏ طب‏..‏ اما اقولك‏..‏ يا حبيبة‏..‏ الو‏..‏ لو الناس كلموني علي الموبايل اللي نسيته عندك ابقي ردي‏..‏ اوكي يا حبيبتي‏..‏ باي
‏*‏ علي فكرة مكتوب علي‏(‏ جوجل‏)‏ انك مرة اتخانقتي مع ميرفت امين علي غرفة ملابس مكيفة؟
‏**‏ ميرفت امين‏..‏ مستحيل اتخانق معاها‏,‏ دي ست رقيقة جدا‏,‏ وعيد ميلادها بعد عيد ميلادي بيوم‏,‏ كل سنة تبعتلي ورد و ابعتلها ورد‏,‏ هي و اسعاد يونس ومني زكي من اقرب صديقاتي في الوسط
‏*‏ بالمناسبة‏,‏ انا فوجئت بان الاحاديث الصحفية معك‏,‏ عددها مش قد نجوميتك‏,‏ شكلك كده ما بيحبش الصحفيين ؟
‏**‏ بيغيظوني‏...‏ واحد يقولي كلميني عن بداياتك‏...‏ انا لسه هاتكلم عن ايام معهد فنون مسرحية‏,‏ وانا ولادي كبار في الجامعة ؟
وحد يسألني ما هي اعمالك القادمة ؟‏.‏
مع ان عندي سيناريوهات‏(‏ تملي اوضة‏)‏ لكني لا احب الاجابات بتاعة والله انا مترددة‏..‏ بافكر و بادرس والكلام ده‏,‏ انا ممثلة باحب شغلي جدا‏,‏ وبعد ما اعمل الدور انساه‏,‏ وافكر في اللي جاي بعده‏..‏
مرة فزت بجائزة احسن ممثلة في مهرجان اسكندرية السينمائي‏,‏ واتصل بي صحفي يسألني عن الدور الذي فزت عنه في فيلم‏(‏ كلام في الممنوع‏),‏ فقلت له ممكن تكلمني كمان‏10‏ دقايق‏,‏ و اسرعت اتصل بالمخرج واسأله‏:‏ و النبي تلحقني‏..‏ فكرني‏,‏ هو انا كان دوري في القصة ايه بالظبط ؟
المخرج طبعا وقع من الضحك و قالي لو حد من بتوع المهرجان‏,‏ عرف الموضوع ده‏,‏ والله ليسحبوا منك الجايزة‏!‏
‏*‏ معقول مش فاكرة الدور الذي اعطاك جائزة احسن ممثلة ؟
‏**‏ ابتسمت ابتسامة سعادة واسعة وقالت كأنها تتحدث لنفسها‏:‏ فاكرة صورة ابني احمد وهو يتسلم الجائزة نيابة عني‏..‏ كان عنده‏12‏ سنة وكان شكله جميل
‏*‏ والآن ؟
‏**‏ الآن عنده‏21‏ سنة
‏*‏ اقصد ماذا عن موقفك الآن‏,‏ من مسلسلاتك في التليفزيون ؟
‏-‏ لا اراها ابدا‏..‏و غالبا وقت اذاعة المسلسل أكون في الشارع كي اضمن اني لن اكون امام شاشة التليفزيون‏,‏ اولادي يعرفون ذلك جيدا و يغيرون المحطة لو تصادف ان دخلت الحجرة و في التليفزيون احد مسلسلاتي‏!‏
مسلسل‏(‏ الرجل الآخر‏)‏ لسه اول مرة اشوفه السنة دي‏..‏
ابن شافني واقفة اتفرج علي مشهد في المسلسل‏,‏ استغرب جدا‏,‏ قلت له اصل شاكلي عاجبني‏..‏ كنت صغيرة
‏*‏ انت لسه صغيرة وقمر‏.....‏
‏**‏ الله يخليكي‏..‏ بس انتي شكلك بردان قوي‏,‏ عايزة اطلب لك شاي‏..‏ والراجل مش راضي ييجي‏!‏
‏-‏ الكافيتريا شطبت‏,‏ و الناس طفت النور‏,‏ النادي شكله هايقفل علينا‏.....‏ يا دي الداهية
فيه ايه يا بنتي ؟
جوزي كلمني ع الموبايل‏9‏ مرات وانا ما سمعتش الرنة‏,‏ شكله هايدهولني عشان اتأخرت تحبي اكلمه و اقوله انك معايا ؟
لا مافيش داعي‏..‏ يادوبك اروح‏...‏ تصبحي علي خير
‏(‏ في اليوم التالي جاتني مكالمة غير متوقعة‏)‏
‏-‏ الو‏..‏ انا ماجدة زكي‏..‏ باطمئن عليك
اخيرا اكتشفت لماذا اخترت ان ارتدي بلوزة تشبه البلوزة الموف التي رأيتها بها في لقائنا الاول ؟ لقد احببت ماجدة زكي بسرعة‏,‏ وصار عندي رغبة دفينة في صداقتها‏..‏
ربما هو نفس السبب الذي يجعل الناس يحبونها بسرعة و يرون فيها الام و الاخت و الست المصرية التي يعرفونها عز المعرفة‏..‏
ماجدة زكي انسانة حقيقية‏,‏ جديرة بالحب‏,‏ و الذهاب معها للسينيما قطعا يستحق محاولة
ما رايك يا ماجدة لو ندخل معا فيلم‏(‏ ميرل استريب‏)‏ الاخير‏...‏ بيقولوا لذيذ قوي‏,‏ و بيناقش مشاكل المرأة ؟‏!!‏