سؤال لكل فارغ ومدعى المدنية وعامل نفسه فافى اوى وقرفان من بساطة ملابس المصريين فى شرم والغردقة . اولا هل انت بتحتقر وتعيب على امك لما تبقى لابسة حجاب يناسب سنها ووقارها ولا اختك وهى لابسة عباية تحتها بنطلون تستر به نفسها ولا على ابوك بملابسه البيضاء عشان تعيب على دول وتفضحهم وتسخر من ملابسهم!؟ وكل مشكلتهم معاك انها شرم مش رأس البر أو جمصة على اعتبار ان دى مصايف للمهمشين والدهماء ومناطق للشحاتين فقط. خلاص فهمنا انك (فافى) ومتربى وسط المايوهات الساخنة والعرى التام عشان تبقى فرحان وفخور بشرم الشيخ .... زعلان اوى ان فيه ناس لابسه حشمة بس لو امهاتنا واخواتنا ارتدوا المايوة هتبقى مبسوط؟ ولا هتسيبهم فى حالهم ومش هتتحرش بيهم زى ما بتعمل، طب مش هتقول ايه التسيب والانحلال دة عيب عليكم تلبسوا مايوه واحتشموا طب لو كانت دى بلد السياح الاجانب وده لبسهم هل كانوا هيعملوا زيكم كده وينهشوا فى لحم بعض وينشروا صور تنتهك الخصوصية لولاد بلدهم على مواقع التواصل من غير حتى ما تتعب نفسك وتظلل اعينهم وانتهكت خصوصيتهم وبالمناسبة متقدرش تعمل كده مع السياح الاجانب وعامل نفسك حزين على سياحة بلدك وانت واخدها مادة للسخرية والتسلية مع اصحابك على الفيس بوك وبتنشر صور خادشة للحياء مركزة على اجسام سيدات مصريات فضليات فى مقام امك او اختك وبتسخر من حجم أجسامهم وبتكشف سترهم لمجرد ان جسمها مش مثالى ومش لابسة مايوه ...... العيب مش فى اللبس الفضفاض والطرحة على الراس , العيب على الراس الفاضية بتاعتكم فهل اصبح المايوه الساخن هو الزى الرسمى لشواطىء شرم الشيخ المصرية وانت اللى هيصت فى الهيصة لما بعض الاماكن السياحية فى شرم منعت دخول المحجبات فيها وعملت نفسك شيخ أزهر . وعملت حملات مضادة على الفيس بوك تنتقد تلك القرارات العنصرية ونسيت ان اللى انت بتعمله الان هو قمه العنصرية . زعلانين اوى على الأكل اللى بيترمى , معاك حق جزئيا ولكن لو الناس دى اتعلمت فى المدارس الاتيكيت وفهمها الاعلام ازاى تاكل وازاى تشرب وازاى تحافظ على صحتها مكنتش شوفت المنظر دة ابدا و نسيت ان قنوات الطبخ المستفزة تحاصرهم يوميا وانهم مش لوحدهم اللى بيعملوا كدة وفيه شعوب كتيرة بتعمل اكتر لكن معندهاش حد بيعمل زيك كده وبيفضح اهل بلده زيك بنشرك الصور دى وترجع تقول السياحة اتضربت طب ما انت اللى بتخربها وانت عامل نفسك مصور صحفى وبتصور فى الناس وتتريق عليهم وعلى طريقة لبسهم واكلهم وسلوكياتهم وانت يمكن زيهم واسوأ منهم وجزء لا يتجزأ منهم , والبجاحة بقى هو فبركة الصور للشعب الغلبان واللى فرحان بحياه عمره ما عاشها عشان تشوهوها بزيادة ومفبركين صور تغاير الحقيقة وكأنها حملة تشوية متعمدة ومنها تركيب صورة لسيدة تحمل شنطة على راسها فى مطعم احد الفنادق على اعتبار أنها معبية الاكل وهى تركيب وركزو كويس يا (امعة منك له) ... هتشوف انها خضار وطماطم وكيس رز او مكرونه زى اللى امى وامك بتشتريها من السوق مش اكل (معبياه), غير ان نظام البوفيه المفتوح بيمنع ده من الخروج بالطعام من الاساس وصور اخرى من شواطىء عامة وتنشروها على انها من شرم والغردقة. هل مستكترين كام يوم على شعب طيب وبسيط وعاوزين تحرمو عليه خير بلده واماكنها السياحية وافتكرتوه بس وقت الكساد السياحى ورايح بفلوسه واللى غالبا اكتر من اللى بيدفعه السياح و اللى يا عالم تعب اد ايه فى جمعها , يحدث ذلك فى نفس الوقت اللى بيتعمل فيه مناشدات وحملات لجلب سياح للاقامة بالمجان بخلاف انه لا يعامل نفس معاملة الاجانب ولا تقدم له نفس الخدمات بنفس الجودة على اعتبار انه مصرى وجعان ومحروم وجاى يخربها كانه مواطن درجة ثالثة فى بلده , هو حرام علينا حلال عليهم ولا ايه , حزينة على ما وصلنا اليه من جلد الذات وتطبيق عقدة الخواجة حرفيا والتقليل الدائم من شأن انفسنا , مننكرش اننا محتاجين نعرف بعض الاتيكيت ونلتزم بالنظام والقواعد بتلك الاماكن السياحة الهامة بس قبل ما تطالبنى بده وفر لى اولا معرفته بكل الوسائل تعليما واعلاميا وتثقيفيا وعاملنى كانسان ومواطن درجة اولى فى بلدى. لمزيد من مقالات سحر عبد الغنى