بالفيديو.. ريهام سعيد تسُّب «إعلامي كبير» على الهواء

قالت الإعلامية ريهام سعيد، في برنامجها «صبايا الخير» إن «إعلامي كبير» عرض على أهل الطفل، الذي عرضت مشكلته على أنه تائه وأعادته إلى أهله في برنامجها، مبلغ 10 آلاف جنيهًا للظهور معه في برنامجه وادعاء كذبها، فيما وجهت لذلك الإعلامي كلمة قائلة: «أنت أصلك واطي».
وأوضحت «سعيد»، في مقدمة برنامجها: «تلقيت مكالمة من المنتج أحمد مهران، بيقولي هقولك حاجة بس براحة قبل الهواء بس متزعليش أنا قلت حصل مصيبة.. قال لي هناك زميل إعلامي كبير بعت ناس لأبوالولد في البيت وعرض عليهم 10 آلاف جنيه عشان يطلعوا معاه في البرنامج ويقولوا إن ريهام سعيد كذابة، وأنه كان متأجر مكنتش تايه ولا حاجة».
وأكدت «سعيد» أن الأسرة رفضت العرض وأضافت: «أنا استغربته البني آدم ده، يعني من غير إعلام ومن غير أي حاجة، أنت طلعت على الشاشة وأنت عارف أنه غلط وعارف إن الولد ده كان موجود فعلًا وعارف لأنك دافع فلوس عشان يتقال غير كدة.. أنت كبني آدم تستحمل ده على نفسك إزاي؟».
وأضافت: «وقعت ريهام سعيد، غارت في ستين داهية، إيه، شوهت سمعة ست والست دي عندها عيال وعندها أهل وعندها أم وعندها أب.. أنت بقى هتكمل مسيرتك الإعلامية، طول النهار تقعدلي مع شيوخ وطول النهار تعملي مش عارفة إيه، وبتعمل كدة، إزاي؟».
واستطردت، بعد عرض تقرير بالقصة على لسان والد الطفل: «كلمناكم وسجلنا المكالمة وطلعتوا قناة كبيرة وإعلامي كبير أوي.. بس أنت صغير، اتكسف من نفسك أوي، افضل مكسوف من نفسك طول الوقت أنا مصورالك كل حاجة ومسجلالك كل حاجة، بس أنا أحسن من بكتير، عارف ليه؟ عشان أنا محترمة ومتربية وناجحة بجد، ناجحة بفضل ربنا وحب الناس عشان أنا صادقة مع الناس».
وتابعت: «عيب ده أنت راجل.. عامل بس متدين أوي ومؤدب أوي، هفضل محتفظة بيهم كدة.. أنت ناسي حاجة مهمة أوي، وأنت قاعد مع شيخ من الشيوخ اللي بتقعد معاهم، افتكر إن فيه اللي أعلى مني ومنك بكثير اللي ممكن بكرة تبقى أنت ولا حاجة، وعلى فكرة أنت ولا حاجة، لأن ده تصرف مش محترم، تصرف عصبجية.. أنت عارف أنك كذاب ودافع فلوس عشان شهادة زور».
واختتمت: «أنا بس عايزة أوريكوا إن حرب القنوات دي بقى كل واحد بيدخله فلوس معينة وبقى سباق مين يعلى عن مين، بس بيفرق التربية، بيفرق الأصل كان إيه زمان.. كان ولا حاجة وبقى حاجة، كان مبيلسش ولبس كان مبياكلش وأكل، لكن الحمد لله أنا من يومي بنت ناس، مش الشغلانة اللي أكلتني ولبستني وركبتني عربية، هنعمل إيه بقى الأصل واطي، هنعليه إزاي، بس أنا هفضل معلمة عليك كدة ومعايا مستنداتي».
اشترك الآن لتصلك أهم الأخبار لحظة بلحظة