يا رب...

تراب القلب .. سَامعنى ؟ معايا ولّا فين يعنى ؟ أدان الفجر بيدوّي و لو بانوي أصلِّى فرض فات مني بالاقى الميّة ممنوعة و حتى الأرض مش طاهرة.. عليّا اتكبّ يمِّمني
بقلب بيرتعش بالناس
و بالدنيا
و آخر الليل تدارى العتمة أشكالهم
باجرجر نقطتين إحساس
محوّشهم
و»احضّر «روحى تشكيلهم
عشان لو ترفض الدمعة تطَاوعني
و انا بابكى بضَعف النبض جوّايا
ألاقى حد يسمعني
و انا باهمس
بصوت شارب حنين سكران
بيتطوّح على ندمُه
و متزوّد غنا خيبان
نشاز نغم الأمان جوّاه
و»نوتة» لحنُه مسروقة من الأحزان
و معزوفة بْكمان عصبى حدف وترُه
لخوف من ضل رعشة ايدى ع الجدران
فيتكسّر
وباتفرَّق لكام آهة
بينعوا حلم ولا عمره هيتفسّر
بُكاه «دوبلير» عيون غيرى مابتحسش
بيتبرع يحسّلها
و أدوار البطل رافض يمثّلها
وكازينو اللهفة للمجهول سرق عمري
و بيضيّع شقا روحي
فى ورق اللعب ع المكشوف
ويخسرني
و قلبى «الشايب» اللابد ف «واد»خوّاف
يغمِّى الشوف ويتحكّم فى إحساسي
فيظلمني
فاقول انى من الظالمين!
و مهما بينتحر نبضُه
و اموت منه ... مابيموتشي
و حالف قبل ما يمشي
و قبل ما تحضنُه أرضُه
فى آخر خطوة من ذنبُه..
يسلِّم لي
براءة بتحبى لرحابك
و لو عِجزِت
هتقوى برحمتك لحظة
مَ اقول يا رب
يا رب.