عز ا للنهار

جهزت ضحكتين و خدت ف ايدى السبرتاية و فنجانين

عشان لما نحب نشرب القهوة
و جيت ازورك يا عم عبدالرحمن
قابلونى وقالوا مريض
نايم هناك على سريره العريض
ساند راسه علي موال
خايف عليك و علي العيا ل
مش قاعد النهاردة علي كرسيه الهزاز
بصيت عليه من ورا القزاز
صحيح باين عليه إنه متألم
لكن لسه عاوز يتكلم
أنا متأكد
لسه ف صوته قصيدة
لسه ف حنجرته تغريدة ...
و عدي الوقت كأنه الخريف
عدي الطبيب من قدامي كأنه كفيف
ما شافنيش
و ما كلمنيش ولا كلمة
حسيت اني مضروب علي خدي ميت لكمة ...
انا كنت جايبلك معايا يا عم عبد الرحمن
كام جواب من بتوع زمان
من بتوع حراجي
ومعاهم برواز
و طالب منك لما تخف
و تقوم بالسلامة
تحط فيه صورة يامنة
و قلت لنفسي فيها ايه لوفاق
وقام حكي و كتب او حتي غني
و شاورتله
فتح عينيه ..
وباشارة معناها استني
و علي ورقة كتبلهم خلوا بالكوا منه
و مسافة ما كتمت البكا جوايا
مسافة ما اتسندت علي حيطة ورايا .....
كان عدي النهار
اللي ما عزتهوش
عدي النهار
و ما لحقتهوش