مذيعة تهاجم عمرو دياب بسبب حفلته الأخيرة: "شيء بشع" والهضبة لا يحترم الجمهور

هاجمت الإعلامية ومذيعة الشارع سارة فؤاد، الفنان عمرو دياب، بسبب حفلته الأخيرة بالجولف، رغم أنها من أشد المعجبات بالهضبة.
وكتبت فؤاد عبر صفحتها على "فيس بوك" تدوينة هاجمت فيها بشدة عمرو دياب ومنظمي الحفل الأخير له قائلة :" بسم الله الرحمن الرحيم
مبدئيا كده معظم الناس اللي عندي عارفة إني متخلفة عمرو دياب مش مجنونة بس، وطول عمري بقول انه الشخص الوحيد اللي ممكن اطبله عادي من غير ما ضميري يوجعني، بس اللي حصل في حفلة النهاردة كان شئ بشع بداية من التنظيم لحد عمرو دياب نفسه.
أول حاجة انا وصحابي جايبين 7 تذاكر الواحدة ب 250 جنيه ولا واحدة اتشافت قبل الدخول بسبب التدافع اللي حصل من الجمهور ومعاملة المنظمين السئية من اول امناء الشرطة للبودي جاردات لمنظمي الحفل نفسهم، قلة ادب واستهتار بأرواح الناس، البنات عمالة تصرخ ومعاهم تذاكر مش عارفين يدخلوا بيها والجاردات عمالين يزقوا الناس لورا بمنتهى العنف عشان فيه ناس مش معاها تذاكر عايزة تدخل، سامعين صريخ من كل مكان ومش بيعدوا حد، فجأة الجمهور كسر البوابات وحصل تدافع كانت نتيجته ان ناس وقعت ع الأرض واتداس عليها بالجزم.
تاني حاجة عمرو كان بيكرر الاغنية اكتر من 4 مرات والناس كلها حست بالملل لدرجة ان فيه ناس كتير كانت بتمشي بدري، برج الحوت اتغنت 5 مرات و اه حبيبي بتاع 4 والاغاني القديمة اكروتت اخر كروتة وكان بيتكلم اكتر ما بيغني ومش فاهمة فيه ايه!
احنا بنحبك وجايين عشان نستمتع مش عشان نتبهدل ونسمع اغاني كل شوية تتعاد.
ياريت ياريت ياريت الحفلات اللي جاية تكون منظمة وبتحترم آدمية جمهورك اللي جايلك من اخر الدنيا عشان يقف قدامك.، لأن انا شخصيا عمري ما فوتلك حفلة من 2006 بس حفلة النهاردة هتخليني ابطل احضر حفلات تاني بالشكل ده.
ياريت نفوق شوية بقى".
وتفاعل عدد كبير من متابعي سارة فؤاد على فيس بوك، مع هذه التدوينة التي هاجمت فيها عمرو دياب وأيدوا رأيها في الحفل وفي عدم تقدير الهضبة لجمهوره، وأداءه السيء والمكرر في الحفل.