أراجوز زمانه

زي النهارده
من اتنين وسبعين سنة
والشمس هاله من غرب البلد
كنت ف ايدين السماسرة
وصناع الأساس
بيعلوا في قايم السنين
وكنت ضحكة
فوق شفايف النخل في تسالي
وكنت شايل علي كتافي
حلم السنابل وحب المعرفة
وكنت فلاح في ايديا النهار
بأغزله بمغزلين
وكنت كام حلم متوارب
مبتداش
وكان وشي سحابه مهاجرة للمدينة
ترهب الأوباش
وكان بيني وبين القمر فدان
قلت ازرعه خضره
بالليل يكون عشره
وبالنهار يكون ستره
وأقسم بشرفي الوطن
اعدي علي داره
يحكيلي قصه منسيه
وأنا احكيله أسراري
ويبق اللي بينا عبور طريق
محتواه الزمن وأنا.......
محتايا أندلق
يملأ شعاب الارض
بالخضره وبالاشعار
ولما طويت حقيبة السنين
وشلتها خلف ضهر الزمن
ومشيت
لقيت خلف مني السنين مطاطيه
خفت (تظبطني) وأنا ماشي
ابعد بعيد عن دايرة الاحلام
وكل مايمر عام.. اهربه
ما أسجلهوش.. واسقطه
من سجل زياراته
أصل أنا وأنا ماشي ساعات
أتوه.. يأخذني الطريق تواه
ساعات ادخل في رفقة السنين
أحسبها نهاية عمر البشر
ولما منتهاش
ابتدي من جديد
ابتدي من تاني
ولما اندفن تحت عرش بالي..
استكين
مابين احتدام حيرتي
وبين توهة خطايا جوايا
يتوه مني اللي عشته.. ولا اعرفهوش
وكأنه قطر ومعدي من سكات
ويدوب يدوب بحلق بعمره جوايا
أسمع صفيره من بعيد
وصوته منتهاش
لكني وأنا ماشي
سألت نفسي سؤال
كان ليه أخ يكبرني ملقتوش
معرفش ايه خلاني اتذكره
لأنه كان زمان
كل مايمر النسيم
يشيل قربته ويسقيني
دلوقتي وأنا فرداني.. نسيت
(اتلخبط) تهت في وضع مش أمثل
مابين أكون أنا السنين
لو أنا الزمان.. أو أنا الطالع
اعلق علي رف بيتي
كل يوم رايه
ترفرف للزمان الجي
مع أني معرفوش.. وماشلتهوش
ولسه حبتدي.. ارش الملح واسمي
ادقدق علي اعتابي
واخطي، تاتا.. تاتا
وأسأل عن الجاي يبقي مين...؟
ودي ايه المكوره في السما.....؟
شمس ولا حلم لسه مبتداش..؟
ولارغيف الطيبين...؟
والناس.. فرداني
أو جمع في رغبة صحاب
كل مايجوني.. اشوفني من تاني
حاصد غيطاني
ومستني الزمان الجي
ما اسجلوش
اسقطه من سجل زياراته
الفارق مابينا مش كتير
هوالزمن.. وأنا الانسان
ومسجل حلم السنين
علي جريد النخل في تسالي
ومهاجر فرداني
أعلي في بنيه
فوقها الزمان بيفوت
احضن في قلبي الفواعليه
علي وعد نتقابل
في عيد ميلاد تاني
وأنا مكحكح عجوز
بقالي اتنين وسبعين سنا اراجوز
لاطلعت مادنه..
ولابقالي شأن
ولا أنا معدول عدل
ولافي سكتي انسان
شبك سهامه في الفضا معدول
وبقيت بلا رايه
وبقيت عنيد في ميزان
يوزن صقور الوطن
وأنا عابر سبيل
وكل مايهل عام
تجري ونتسابق......
بفرحة لقا الارض بالسماوات
نحضن بعضنا ونبارك
نزول الضي في كل عام
يوم عيد ميلادي 1/3