مربعات من الواو

سن القلم

قلمي ضحك سنه
رسمني ف العنوان
مهموم ضحك سنه
توهني ف العنوان
قلمي لبس تاجه
قعدت علي عرشه
جنيت ف انتاجه
لقيته مات عرشه
قلمي طلع يمشي
من قبل مايحبي
اتاريني ما فهمشي
والحلم طايح بي
مسحوا ف افكاري
قلمي رجع باكي
عرفت مش كاري
لميت أنا شباكي
قلمي لما اتولد
بنيتله بيته بطين
وقلت له ياولد
انت صلاح حطين
قلمي طلع نخله
من طيب الكلام جاني
عرش البيان نخله
ساقها غنايم وجاني
قلمي ضحك مره
غني مع المواويل
غنوه عتاب مره
رجعنا لبحر الويل
قلمي من فوق ركابه
قللي امشي في ضلي
م الشمس لبست كابه
مين غيره اللي فاضلي
قلمي رسم ميادين
ملاها يفط وقلوب
الكل باسم الدين
عاوزها بالمقلوب
قلمي ف سن الطيش
ماشي علي كيفه
عارفني ماباوطيش
وراني الغرام كيفه
قلمي ربط وسطه
عاوزها واحدة ونص
هز الميدان وسطه
هتف القلم ف النص
قلمي الحبايب قصدوه
رسم خدود بغمازه
بعصاية العشق صادوه
من غير خيط بغمازه
مصر ياتاج العلا
وقلب الشرق ومفارق
الكل فوق منا وعلا
واحنا معانا ما فارق
مش كل المطالب بت
البت دي ليها الواد الفت
يحكم بأمره ويبت
ومن دراعه ياكل ويفت
وياماناس ديابه
خدوا الدنيا غلابا
واحنا ولاحد يأبه
بحق الناس الغلابه
نوح ياشاعر وعدد
اضرب ودعك ورملك
نوع كلامك وعدد
تلاقيه عاجب ورملك
الشعر من بيوت هواره
ماتحبش من بره تناسب
وتتهد البيوت هواره
لو أساسها مش مناسب
ياواد دخلت فصلك
لقيتك مدارس وجامعه
عرفت اصلك وفصلك
لقيتك للفنون جامعه
ياواد دخلت محرابك
وعملت منها إمامك
لقيت من أهلك حرابك
وسلطتي عليا عمامك
ياواد مين اللي نسبوك
ولحرف آخر الهجاية
ناس امك ولاناس ابوك
ولاناس لساها جايه
يافكره لمادبيتي
ضربتك قافيه بخطي
أشاور عليكي دابتي
ولسه يادوب بخطي
ع البر واقف باشاور
لناس ركبوا المراكب
ولسه لعقلي باشاور
الخوف طرّق وراكب
لسه يادوب مفتح
وعاوز اسوقها غنايم
عملت فيها مفتح
اتاريني باحلم ونايم
قلبي أخضر لسه نادي
علي غرامي لسه بدري
هلالي هل السنه دي
إمتي هتكمل يابدري
علي عقلي ادوني لفه
قادوسي نزل ما طالع
لفولي كلامي ف لفه
وضربوا بيها المطالع