"كله متاخد غياب!" قصيدة ل"أشرف الشافعى"

للى من ثورتها هوّن
واللى مانصفهاش وخوّن
واللى قام من نومه كوّن
فكرة مليانة ارتياب
للى قال رح تخربوها
واللى قال امشوا وسيبوها
واللى قال ملعون أبوها
واللى قال بلا طيش شاب
للى قال آسف يا ريس
واللى قال ما هو كان كويس
واللى هرتل واللى هيس
واللى قال " بلاش عتاب"
للى سلمها وباعها
واللى لامها على اندفاعها
واللى قال تنظيم دفعها
لجل ما تجيب الخراب
للى علق كدبه يافطة
واللى ما اتهزش بلفتة
واللى نظّر واللى أفتى
واللى سمّعْ م الكتاب
للى قال تفكير جنونى
واللى قال تنظيم ماسونى
واللى قال ح ينجسونى
واللى قال أيام هباب
للى قال ماحصلش حاجة
واللى عاجباه السذاجة
واللى عاندها بفجاجة
واللى هدّد بالعقاب
للى قال إنه حماها
وبرصاص غدره رماها
واللى ف عيونها عماها
وسابها تنهشها الكلاب
للى أخد القتل غية
واللى سلط بلطجية
واللى طرمخ ع القضية
واللى سانن ألف ناب
للى ماين واللى داهن
واللى عاش للفُجر كاهن
واللى طبع ضميره واهن
واللى فرّط واللى ساب
للى قال نتقل ونهدى
ليه المشاغبة والمناهدة
راح وباع دم بمعاهدة
لما وافق واستجاب
للى لخصها فى جبهة
فاشلة فى صدق المجابهة
جايه ليه ومين اللى جابها
شىء مانعرفلوش جواب
للى ماكانش ف ركابها
بس ما صدق ركبها
وقت ما اتمكن نكبها
وخلا ضحكتها انتحاب
للى قاعد ف المقطم
زاقق الخرفان تبرطم
الطوفان بكرة يحطم
اللى فالتين م الحساب
للى سايق ف الهبالة
واللى فاكرها اشتغالة
واللى عايشها عوالة
واللى عايم ف الندالة
واللى شرّع للسفالة
والأراذل والحثالة
مصر باعتلكم رسالة
"كله متاخد غياب"!