ألف رحمة عليك يا جمال

برغم بعادك بسلم عليك كأنى بإيديا بصافح إيديك
وصورتك تملى فى قلبى وعنيه وسعات لما بفرح بشوف نفسى فيك
وساعات لما بحزن ويحتار دليلى الاقى لسانى بينده عليك
ولما بشوف الوشوش الجِبله واحس ان منهم هيطلعلى عِله
أقول الف رحمه عليك يا جمال ومليون تحيه يا صحبى اليك
...
برغم انك انت معشتش كتير لكن كنت دايما بفكرك كبير
وكانت عنيك شايفه ابعد واعمق وعارفه حدود الهدف والمصير
وكنت الاسد وسط كل الوحوش وفارس وجاهز لصوت النفير
وكان حضن قلبك دوا للعليل وراضى فى حياتك اقل القليل
ومهما تمر السنين يا جمال هتفضل على قلوبنا دايما أمير
...
برغم الزمان اللى اصبح ضنين بفرسان تنور سواد السنين
انا لسه عندى أمل تانى اشوفك واشوف اللى زيك من الملهمين
واشوف مصر تانى ابيه وعافيه ونورها منور على العالمين
واشوف بين ربوعها زهور المحبه واشوف بين قلوبنا الوصال والموده
وأقول الف رحمه عليك يا جمال يا نعم الزعيم الشجاع الامين
...