"اسم شيزوفرينيا" قصيدة ل"أشرف الشافعى"

كل حاجة فيكى ممكن
كل شىء جواكى جايز
تفرحى ف عنيكى أسكن
تزعلى يفصلنا حاجز
مرة تايهة ومرة راسية
مرة فاكرة ومرة ناسية
فهمينى إزاى يا قاسية
أنهزم وأنا أصلى فايز
كل حاجة فيكى واردة
عقل أو مَسة جنون
ليه دفاكى مشاعرة باردة
واليقين مليان ظنون
طب قوليلى إزاى أعاملك
أبكى ولا أبتسملك
انتصر ولا انهزملك
وأبقى قادر ولا عاجز
ثورتك تشبه خضوعك
والشتا بقى زى صيفك
ضحكتك تشبه دموعك
وردتك كما حد سيفك
ممكنك بقى مستحيلك
رجعتك تايهة ف رحيلك
قلت أموت وتشدى حيلك
سبتى جرح ف قلبى نافذ
كل حاجة فيكى ممكن
كل شىء جواكى جايز