على بابا

سرقوا البت من حضن أمها بعد الولاده
البت اسمها ثوره وعمرها سنه وزياده
والام اسمها صابره كام الف سنه ولاده
حكاية قديمه وفكل زمن تلقاها متعاده
كام حرامى ف مغاره بينهبوا قوت الطيابه
وكلاب حراسه ودود معشش فجحور ديابه
وكلمة سر للوطن ما عرفها يوم الغلابه
وف عز اليأس يخرج أمل اسمه على بابا
بطل قال للظلم لا ووقف ف وش العصابه
ثار الولد وانتفض وحطم حيطان كدابه
دخلو الديابه جحورهم ف قلب الغابه
ولبسو توب الشرف وغنوا عال الربابه
فرح الولد وانبسط وخدهم رفاقه وصحابه
وشهدوعلى دخلته والزفه كانت فوق دبابه
وعاشوا فهنا وعدت سنه ونص السنه
وعلى بابا بعد الضنى فرح بحبيبتة مرجانه
استكترو عالوله فرحته وقالوا ده لولانا ولولانا
على بابا من دهشته جرى قوام يستنجد بمولانا
اتارى مولانا هوه كمان عينه فمرجانه
سرقوا م الوله فرحته ملحقش يشوف خلفته
ادى يا ساده حكاية على بابا العتيقه
يا ترى هنفضل نحكيها بنفس الطريقه
ولا على بابا هيعود من تانى وينتصر
وعيونه اللى راح منها البصر
راح تسرى ربيع فعيون البشر
على بابا عمره ما كان حدوته نحكيها لعيالنا قبل النوم
على بابا دة قصة كفاح لشعب صمم انة يفوق مالنوم
على بابا كل من قال للظلم لا وقرر يدفع الثمن
وان راح على بابا راح ييجى بعدة الف شاطر حسن
واللى معلمش بكره يعلم كلمة السر مش افتح يا سمسم
كلمة السر حب الوطن