المشروع القومى المصرى لهدم الآثار

وصاح الشيخ مهللاً فرحاً مقداماً: سنهدم الأصنام والأهرام وأبوالهول!.. لماذا يا سيدنا الشيخ؟ «لأنها تعبد»، وقال بثقة يحسد عليها: «أنا أعلم وأنت تعلم يا أستاذ وائل أن هناك ناس يعبدون الهرم وأبوالهول! ومش عاوزين نتكلم». كان هذا الصياح من الشيخ الذى يفتخر بأنه من المحطمين لتمثالى بوذا فى أفغانستان، وهو يبرر بحماس شديد أن هناك أكثر من 800 مليون إنسان على وجه الأرض يعبدون الصنم المدعو «بوذا». وهنا فات على الأستاذ وائل أن يسأله عن عدد الذين توقفوا عن عبادة بوذا بعد هدم التمثالين؟.. معلش ملحوقة.. المهم أن هذا اللغط الذى أظنه مقصوداً لإلهائنا عن أشياء أخطر تحدث فى سيناء والعريش وحدودنا وأرضنا ووطنا قد بعث فى عقلى على مشروع قومى هائل يمكن أن يلتف حوله كل الشعب المصرى، وسوف يحتاج إلى عمالة بالملايين فيقضى على البطالة، وسوف يحتاج إلى قرض ضخم ندفعه من دمائنا عن طيب خاطر للمشروع القومى، وسوف تنقله كل فضائيات العالم لحظة بلحظة عن التليفزيون المصرى الذى ينادى الآن «لله يا محسنين»، ويمكن يجيب له إعلانات، وسوف نستورد له أجهزة حديثة جداً من جميع دول العالم المتقدمة لأننا دولة بعافية.
والمشروع هو «اهدم آثارك بنفسك» زى لم الزبالة كده.. كيف يبدأ هذا المشروع الفريد لتبدأ به النهضة التى نبحث عنها منذ ستة أشهر؟.. أولا: نعمل دراسة كاملة شاملة يشترك فيها خمسة آلاف عالم متخصص وأستاذ فى الآثار على مستوى العالم لحصر الآثار فى مصر من أول شاطئ المتوسط إلى سيناء «لو كانت لسه موجودة»، وإلى آخر حدود أسوان وحلايب وشلاتين «لو لسه موجودين»، بعد الحصر الشامل يتم ترتيب الأولويات، يعنى نهدم من قبلى لبحرى، ولا من اليمين للشمال، ولو اختلفنا نعمل استفتاء. عموماً أنا أقترح من الجنوب أفضل عشان نقطع رجل السياح الكفرة عبدة رمسيس ونفرتارى، ونهدم معبد رمسيس بأبوسمبل وزوجته اللى جنبه نفرتارى، ثم معبد «فيلة» اللى كان غرقان، ومعابد النوبة كلها اللى حوالين بحيرة ناصر، بعد كده مقابر النبلاء اللى فى بطن الجبل، وبالمرة المتحف، وضريح أغاخان، ودير الأنبا سمعان، والمسلة الناقصة. بعد كده نطلع على بحرى هانلاقى معبد كوم أمبو، بعده معبد إدفو، بعده نوصل إلى الأقصر، وقد أطلق عليها العرب المسلمون هذا الاسم بعد أن بهرتهم بقصورها ومبانيها.. سوف نجد معبد الأقصر، ثم معابد الكرنك، ومتحف الأقصر كمان على الضفة الشرقية.. نعدى ونروح على البر الغربى هانلاقى شغل بالزوفة.. تمثالا ممنون اللى هما للملك أمنحتب الثالث، وبعد كده مقابر توت عنخ آمون، وسيتى، ورمسيس الثالث والسادس، وأمنحتب الثانى، وحور محب، وتحتمس الثالث صانع أول إمبراطورية فى العالم، ومقبرة نفرتارى الرائعة الألوان والرسومات.. بس فى داهية عشان عم الشيخ ما يزعلش.. بعد كده على معبد حتشبسوت ثم الرمسيوم ومعبد مدينة «هابو» ثم مقابر الأشراف، ييييه ما تعدش.. حلو كده.. خلّصنا على الأقصر.. نطلع شمالاً هانقابل معبد دندرة، ومعبد إسنا، آه نسيت معبد الأقصر فوقه جامع أبوالحجاج الأقصرى هانشيله ومعاه كنيسة قبطية مجاورة نجيبها الأرض، ونتسلى على شوية الأديرة الأثرية المنتشرة فى المنطقة.. ثم على سوهاج حيث معبد أبيدوس، وشوية حاجات صغيرة، ثم على أسيوط نهد دير المحرق، وشوية أديرة تانى حواليه، ونطلع على المنيا هايقابلنا تل العمارنة، مدينة إخناتون، وهو صاحب أقدم عقيدة للتوحيد فى العالم بأسره، وهو الذى قال فى أناشيده «يا أيها الإله الأحد الذى لا يوجد بجانبه إله آخر.. يا أيها الإله الذى سوّى نفسه بنفسه خالق كل أرض وبارئ من عليها.. العالم يعيش بصنيع يدك، وكل إنسان أعطيته حاجته وأيامه فى الدنيا معدودات».
بعد ما نقضى على إخناتون ومدينته وسيرته هانطلع على آثار «تونة الجبل» ثم «الأشمونية» ثم مقابر «بنى حسن» وشوية أديرة فى السكة على الماشى، وشوية حاجات بسيطة لغاية دهشور. وفى دهشور نبدأ الشغل الجامد، كام هرم كده زى اللوز «ميدوم» و«الأحمر» و«المائل» وشوية تماثيل.. نخلص على دهشور ونطلع على هضبة الجيزة، ونركز على الهرم الأكبر لأنه هايأخد شوية وقت زيادة وعشان سيدنا الشيخ ما يقولش المشروع القومى اتأخر، ها أقول له شوية معلومات عن الهرم عشان يعذرنا.. بس ما يخافش هانهده يعنى هانهده.. هو مبنى على مساحة 13 فدانا، وعدد الأحجار اللى فيه 2.3 مليون حجر، وكل حجر يوزن 2.5 طن، وبينهم أحجار يصل وزنها إلى 15 طنا، والحجم الكلى للهرم 2.5 مليون متر مكعب، ولو حطينا الحجارة جنب بعضها تعمل سور يحيط بفرنسا ارتفاعه متر، ووزن الهرم 6 ملايين طن.. بصراحة تعبت بس لسه فاضل متاحف كتير، وجوامع فيها أعمدة من معابد الكفار زى جامع عمر بن العاص، وجوامع فى القاهرة الفاطمية والقلعة لأن فيها شوية أحجار قديمة، وكنائس قديمة فيها أعمدة برضه، ده غير تماثيل نهضة مصر، وسعد زغلول، وطلعت حرب، وأسدين قصر النيل لأنى شفت شوية ناس كده بيعبدوهم.. وأحب أطمنه إن الخير كتير جداً.. المشروع ده هايأخد حوالى 120 سنة، ويقضى على البطالة، ويتكلف قد ما يتكلف الخير كتير والقروض أكتر.. وسيكون أول مشروع قومى فى العالم «للهدم» وسيدخل موسوعة الخواجة الكافر «جينيس»، وإذا كانت الأحجار المكسرة هاتعمل مشكلة كل شىء له حل عندى، هانعمل بعد كده المشروع القومى لردم نهر النيل بالحجارة بتاعة الأصنام.. نسيت أقول لسيدنا الشيخ معلومة صغيرة، الهرم مش صنم، الهرم ده «مقبرة»، وكلنا لها وما دايم إلا وجه الله العلى العظيم.