مسحراتى الثورة10

اصحى يانايم وحد الدايم
يلا ع الميدان
مفيش حرية مجاناً
ولا منحة ولا صدقة
ولا فرمان من السلطان
ولا بتنزل مع المطرة
مفيش حرية بالتقسيط
ولا حرية بالتنقيط
مفيش حرية يوم السبت
وباقى الشهر عبودية
أبيع عمرى فدا حرية الأوطان
أبيع عمرى ولا مصرى يبات متهان
ولا عريان ولا دمعة على خده
ولا جلاده يسخر منه
من جزره ومن مده
أبيع عمرى فدا بلدى
ويرخص عمرى ولا يسوى
ويلزم له نون النسوة
لو إستخسرته ف بلادى
إصحى يا نايم وحد الدايم
يلا ع الميدان