رغم الخطر

- مهداة إلى العاملين من أجل مصر
رغم الخطر ماشى ولا هامك
الدنيا متلونه وانت ولا هامك
لو يوم يصيبها العطش ترويها من دمك
بلدك
ودينك
فى الحياه همك
.....................................
عامل وإسمك م العمل منحوت
عامل بتنجز عمل
مش بالكلام والصوت
وتمر بينا الليالى أو علينا تفوت
تفضل كده ف العمل
عايش لحد الموت
.......................................
قلبك وتر مشدود
والحب فيه غنى
عايش ف دنيانا
لكن إنت ف الجنه
يالى بتبنى وتزرع
ف الحياه دايما
كل الكفوف
من زرعك بتتحنى
..........................................
عامل
جميله الكلمه
عود بيتمايل
لا كنت يوم بطال
ولا كنت يوم خامل
عامل
بتزرع رغيف العيش
لاولادك
عامل بترفع علم
منشور على بلادك
حاسس بإن البلد
اختك
واخوك
وامك
وإن البلد لو بكت
راح تبك بدموعك
ولو أصابها ألم
يبقى النزيف
دمك
علشان كده رغم الخطر ماشى
ولا هامك
لو يوم يصيبها العطش
ترويها من دمك
بلدك
ودينك ف الحياه همك