تبقى أنت أكيد فى مصر

لما تلاقى الزبالة مرمية فى كل حتة فى الشوارع وعلى الأرصفة حتى قدام شقتك واللى يغيظ بقى أن الحكومة زودت فاتورة الكهرباء عشان إيه؟ ضافت عليها فلوس الزبالة المرمية دى والمشكلة إن أنا شايفة إن الزبالة دى كترت من بعد ما الحكومة بدأت تلم فلوس الزبالة.
وأكيد أنت فى مصر لما يبقى وراك مشوار مهم وتقف فى الإشارة بالساعة والساعتين مستنى التشريفة لما تبقى تعدى، ولا تكون فى الشارع وماشى أبطأ من السلحفاة بسبب السادة الباعة الجائلين الذين احتلوا الشوارع، ولما تكون ماشى فى الشارع بالليل، ويطلع عليك بلطجى يسبتك بمطوة وياخذ كل اللى معالك يبقى تعرف أكيد أنك فى مصر.
وأنت أكيد فى مصر لما متعرفش تعدى من الثانوية العامة من غير ما تاخذ دروس خصوصية فى كل المواد.
وأكيد لازم تعرف أنك فى مصر لما يكون ليك جار رخم وتبقى الشقة بتعته بتنقط مياه على سقف الشقة بتعتك، وهو مش عايز يصلح العيب اللى عنده عشان ميدفعش فلوس وتروح تعمل محضر فى القسم ويقولك الظابط يبقى الحال كما هو عليه وعلى المتضرر اللجوء للقضاء.
وأنت فى مصر فعلا لما يقولوا علينا بلد ديمقراطى ونكون إحنا مش حاسين بالحرية ومقيدين فى كل شىء حتى السلطة الرابعة اللى هى الصحافة مقيدة يبقى فين الديقراطية دى اللى بيقولوا عليها ولا دى مش ديمقراطية، دى لسة بروفة عليها.
ويبقى أكيد أنت مش فى مصر لو قرات كل الحاجات دى من غير ما تتضحك.