دم الشهيد

يا نظام مبارك لسه شايفينوا صلصة
بجرة قلم تبرءوا القتلة وتفضوها جلسة
بالذمة دى مش مصيبة أو تتوصف كارثة
إحنا مش طالبين مستحيل كل اللى عايزينه قصاص
واللى قتل يتقتل علنى ووسط الناس
النفس النفس والعين بالعين مش ده كلام الحق رب الناس
يعنى إيه إبنى يتقتل واللى قتله براءة
يعنى يقتل تانى وتالت ورابع وبكل جراءة
ما هو عرف ديتها خلاص يقتل وحياخد براءة
علمونا فى المدارس وقرينا فى كتب القراءة
العدل أساس الملك والقصاص حياة يعنى مش براءة
طيب إبنى لما ضحى كان بيضحى لمين
مش برضه علشانك يا مصر وعشانكوا يا مصريين
يا اللى حسيت معنى الضنا بطالبك بكلمة حق
أسكت على دم الشهيد ولا أقول لأ
أنا ابنى لما اتقتل كان آخر هتافة مصر
كان حالف يحررها وياخدها من نصر لنصر
لكن رصاص الخيانة عجل بسرعة بموته
ولسه يا بلدى عايش بيسمعك صوته
سامعه بينادى علينا دمى أمانة
ونفسه ثورتنا تكمل ويسمع غنانا
دمى أمانة يا بويا أمى يا أهلى يا ثوار
دمى لو راح هدر حتبقوا مش أحرار
وعمرك يا مصر بعدها ما راح تشوفى نهار
لو فرطى فى دم ولادك الشهدا من الثوار
نام ياشهيد فى الجنة مع الأبرار
وعهد علينا ناخد بتارك ونكشف الأسرار
ونرجع مصر تانى حرة موطن الأحرار
وهتافنا يفضل مدوى بيرعب الأشرار
ثوار أحرار حنكمل المشوار