عمدة خواجه

فرح العمدة بدأ.... واللحم فيه أكوام
مابنحبوش وحنروح له ... وحنقول له ياباشا تمام
العمده قاعد على الكنبة... وحواليه الجميع خدام
مسند ورا ضهره.... وأما الكرش من قدام
رفع الحواجب فى الهوا.... قال اسمعوا يا كرام
تسمع كلامى يا جدع.... تاكل كمان وتنام
تعصى الأوامر يا ولد.... حتشوف عذاب وآلام
الكل ساكت يستمع.... والجوع ده له أحكام
بصيت على عوضين وقلت له... قوم يله بينا قوام
اصل المكان مش محترم... ولا فيه أدب ولا فى احترام
ومشينا خطوة ناحيته.... قلنا نشوف مين سام
عمده خواجه فى البلد.... يحكم سنين وأيام
ورفعت أيدى بالعصا .... وضربته ضربة تمام
أتارى العمدة من خشب.... والأمركة كدب وخداع وأوهام