قرّرررب قرّررررب

يلّا يا جدعان. قناع الخونة يا جدعان. قناع فنديتا بتاع الفيلم الثورى الشهير اللى العالم اللى مش لاقية حاجة تعملها قالت لك المخربين يوم الثورة هيعرفوا نفسهم بيه (على أساس إنها ثورة فى فيلم كارتون يا جدعان). قرّررب قرّررب. خد فكرة واشترى بكرة. وآدى قناع أكتر ناس اتأذوا من مبارك وأول ما مسكوا البرلمان قالوا لك خروج آمن واحتفالات وليالى ملاح، وقوام نسيوا أفعال كل سفاح. طوف وشوف وادينى أكتر. آدى ملحن تربية كباريهات قضى عمره بيرد على اتهاماته بسرقة الألحان، بعد الثورة لبس الوش وبعد الهرتلة بيشكك فى عمى أحمد حرارة وعايز يكشف عليه عشان يتأكد.. ياسلام على الواطى لما يفاجئنا بمستوى أوطى يا جدعان. فتح عينك تاكل ملبن، انظر حولك وشوف القناع بيعمل إيه. آدى قناع رئيس تحرير يهاجم ولا يسكتش إلا لما يتحلّى بقه بإعلانات، ومرشح رياسة حلّى بقه ب3 مليون جنيه قام لابس الوش وشكر فيه بعد ما كان بيهاجمه يا جدعان. قرّررب قرّررب. وآدى ناس قلعت الوش ووشهم الحقيقى بان يا جدعان. يضربوا النسوان ويشتموا فى الشرفا ويقولوا على أشرف ناس فى الكون بلطجية، حتى الشيخ والمهندس والبنت المسحولة والمتعرية والمضروبة يقولوا لك إيه اللى نزلهم يا جدعان. خُشّوا ع الكبيرة يا جدعان. وآدى قناع طنطاوى يا جدعان. شوف حلو وجميل إزاى، وأول ما قلعه لقينا مبارك. إحنا اتخمينا يا جدعان.. ويسقط حكم العسكر فى كل زمان.