محمد رمضان مدافعا عن نجله: الأطفال قالوله أنت أسود زى أبوك وأتعرض لاضطهاد من 11 سنة

دافع النجم محمد رمضان عن نجله بعد أزمته الأخيرة التى تعرض لها مع أصدقائه واتهامه بالاعتداء عليهم، ونشر رمضان بوست عبر حسابه الشخصي بموقع فيس بوك وكتب قائلاً: "القانون ده من 2018 يا سادة بضرورة حماية الطفل والعيلة بحجب هوية الطفل واسمه وصورته عن الإعلام والصحافة، حتى لو كان مُجرد شاهد في قضية ولكن لأن الطفل ده أبوه محمد رمضان (يبقى حلال)، وبالأمر يصدروا بيان صحفى لكل الصحف والمواقع العامة والخاصة والحكومية انشر صورة ابن محمد رمضان واكتب إنه هيتاخد من أمه وأبوه وهيروح دار الرعاية، مع إن القانون بيمنع النشر ولكنهم نشروا".
وأضاف رمضان في البوست قائلاً: "من حقى كأب أعرف مين خالف القانون وأصدر البيان الصحفي اللي مفيش مؤسسة واحدة قدرت ترفض نشره، ورغم كل شيء لا أشك أبداً في نزاهة القضاء المصري، ابني اللي كان واضح في الڤيديو اللي النيابة شافته إنه كان قاعد في حاله مع أخته الصغيرة في النادي وراحوله مجموعة أطفال يقولوله أنت أسود زي أبوك، وأبوك عنده ڤيلا كبيرة وعربيات علشان فلوسه حرام إنما احنا عايشين في شقق نيو جيزة علشان أهالينا مش حرامية".
وتابع رمضان قائلاً: "ولما ابني كلمني في التليفون سمعت الكلام ده بنفسي، وواضح إن ده كلام أهل طفل منهم لأن مستحيل طفل يفكر كدة وده في حد ذاته بيزرع الحقد والغل الطبقي بين الأطفال، ورحت لابني النادي واتكلمت مع الأطفال قدام فرد الأمن ومدرب السباحة إنكم إخوات وجيران وده واضح في فيديوهات النادي اللي شافتها النيابة".
وأضاف محمد رمضان في منشوره قائلاً: "عموماً دي حلقة من سلسلة طويلة من الاضطهاد الواضح والقسوة والتعنت تجاهي لأكثر من 11 سنة وبكتب النهاردة بس علشان ماتخيلتش انهم يدخلوا طفل عنده 11 سنة في معركتهم مع أبوه، ماتوقعتش قسوة الحكم والتشهير بيا وبعيلتي للدرجة دي، وللعلم الشارع المصري فاهم اللي بيحصل وشايفه بوضوح الشمس، لكن (مهما حاولوا ومهما ظلموا سواء بالقصد او بالجهل هنفضل أنا وأولادي وعيلتي نحب بلدنا وهنعيش ونموت فيها، ولا عاش ولا كان اللي يكرهني فمصر، نحيا كامصريين أولاً بحبنا لبعض بدون غيرة أو حقد أو استكتار علشان تحيا مصر".
وحددت المحكمة المختصة أولى جلسات معارضة نجل الفنان محمد رمضان على حكم إيداعه فى دار رعاية، غيابيًا جلسة 19 يونيو المقبل.
وقضت محكمة الطفل، فى وقت سابق بإيداع نجل الفنان محمد رمضان فى إحدى دور الرعاية التأديبية غيابيا، فى اتهامه بالاعتداء على زميله داخل نادى نيو جيزة.