شقيقة سعاد حسنى ترد على الخطاب المنسوب للسندريلا: مش خطها والورقة تبدو حديثة.. لا نطالب بشىء ولا داعى للحديث عن علاقة العندليب وسعاد فكلاهما بين يدى الله.. أسرة عبد الحليم حافظ: لا يوجد دليل مادى على زواجه

علقت جيهان شقيقة سعاد حسني في تصريحات خاصة ل"اليوم السابع" على الخطاب الذي نشره ورثة عبد الحليم حافظ، مؤكدين أن عبد الحليم حافظ لم يتزوج، قائلة إن أحد أفراد أسرة عبد الحليم رفع عليها قضية وخسرها بسبب قصة زواج عبد الحليم وسعاد، مؤكدة أنها لن تقول شيئا عن الأمر، ولكن الإعلامي مفيد فوزي والإعلامي منير مطاوع ومن عاصروا قصة حبهما وزواجهما هم من أعلنوا عن تلك الزيجة التي كانت في السر ثم خرجت للنور، ومنير مطاوع أجرى حديثا معها في لندن وأكدت له زواجها من عبد الحليم حافظ، والكاتب محمود مطر كتب في كتابه عن زواج سعاد حليم.
وتعجبت جيهان في حديثها من إعادة فتح الموضوع من جديد بعد خسارة ورثة عبد الحليم القضية، رغم أن سعاد وحليم توفاهما الله ولا نريد شيئا من ورثة عبد الحليم.
وأشارت جيهان شقيقة سعاد حسني إلى أنه لا داعي لنشر مثل هذه الخطابات فكلاهما بين يدي الله، ومثل هذه الخطابات لن تغير شيئا، مشيرة إلى أن الخطاب ليس بخط سعاد حسني، والورق المكتوب عليه الخطاب يبدو حديثا، وإذا كان الخطاب من وقت عبد الحليم وسعاد كان لا بد أن يبدو قديما وليس بهذه الحداثة، ولماذا لم ينشر الخطاب بالكامل لماذا تم اجتزاء سطور وحذف سطور أخرى، مؤكدة أن تلك الأفعال ما هي إلا سعي وراء الشهرة.
فيما علق عبد الحليم الشناوي ابن الحاجة زينب ابنة الحاجة علية شقيقة عبد الحليم حافظ تعليقا بعد نشر الأسرة عبر صفحتها في موقع التواصل الاجتماعي فيسبوك بيانا كشفت من خلاله تفاصيل جديدة حول زواجه من الفنانة سعاد حسنى، وكتب: "إشاعة طلعت من 31 سنة مافيهاش دليل مادي واحد إن حليم إتجوز علشان ناس عايز يتسلط عليها الضوء ولما الأسرة تطلع جواب بخط يد السيدة الفاضلة وبتأكد فيه أن حليم مبقاش يحبها وبيقول للناس كلها كده، هيرجع بعد كده في كلامه ويتجوزها.. ده عبد الحليم حافظ يا جماعة شخصية عامة وفنان كبير وسمعته وفنه كان أهم بكتير من أي واحدة أياً كان هي مين علشان يتراجع زي ما خيالكم موديكم.. وبعدين هي دي رسالة بين أتنين متجوزين.. هو في اتنين متجوزين بيبعتوا لبعض أصلاً جوابات بالشكل دة.. وناس تانية تقولك أتقوا الله في الأموات.. طب كنت فين يا عم الحج لما طلعوا إشاعة على راجل متوفى بين يديّ الله ب17 سنة.. ولا بس بتحبوا تنشروا إشاعات وكذب وتعظموا اللي بيطلعها ولما حد يطلع ينفيها تهاجموه.. !!
وكشفت أسرة العندليب الراحل عبد الحليم حافظ، عن جواب بخط يد حبيبة العندليب، حيث قالت في بيان لها، جاء فيه: "عدى على وفاتك يا حليم حوالي نصف قرن والناس لسه بتسأل هل الإشاعة عن جوازك حقيقية ولا لأ؟، يا حليم أنت أعظم واحد غنيت للحب ومن وجهة نظري ده كان بسبب حرمانك منه من أول حب الأم اللي اتحرمت منه يوم ولادتك لحد الحرمان من حب الزوجة والأبناء، عشان في ناس كتير بتحب تتشهر وخصوصا لما أضواء الشهرة عندها بتقل وتتطفي فيجيبوا سيرتك عشان يرجعوا تاني في دائرة الضوء".
وتابع البيان: "إشاعات كتير طلعت وأنت عايش منها الإشاعات اللي كانت بتقول أنك بتتدعي المرض علشان تنال تعاطف الجمهور وإن نزيفك على المسرح كان كذب ولما سافرت في آخر رحلة علاج طلعت الإشاعة اللي بتقول إن حليم بيتدعي أنه مسافر لندن للعلاج وهو بيتفسح ويلف العالم ورجعت بعدها مصر في تابوت وأخرست ألسنة كل اللي كانوا بيقولوا أنك بتمثل وبتدعي المرض، وإشاعة الجواز اللي طلعت بعد وفاتك ب17 سنة من ناس المفروض أنهم كانوا أصدقائك واستمرت الإشاعة بدون أي مستند أو دليل وكان نفسي ألاقي حاجة تنفيها بدليل قاطع".
وأضاف: "أنا كنت عارف ومتأكد إنك ماتجوزتش لأنك كنت عايش لأهلك وفنك، ومرضك خلاك تخاف تتجوز وتظلم معاك زوجة وأبناء وكفاية عيلتك اللي عاشوا معاك قساوة مرضك وده اللي أكدتهولي أمي وقبلها جدتي عليه الله يرحمهم ويحسن إليهم، وإحنا كأسرة عمرنا ما جرينا ورا تريند أو شهرة زائفة أو تاجرنا بأخبار كاذبة وبنحترم نفسنا وبنحترم جمهورك العريض في العالم كله ومحبيك، وبنلتزم الصمت وبنحاول دايمًا نحافظ علي سمعة وسيرة الأسرة الطيبة ولما بنتحدث أو بننفي أي إشاعات أو أخبار لازم يكون معانا دليل أو حاجة تثبت صحة كلامنا للحفاظ علي مصداقية العائلة وحب الناس واحترامهم لينا يجبرنا أننا منقولش حاجة إلا لو متأكدين منها بنسبة 100%".