أطفال الانتخابات يهتفون: " الاستبن هيخلى البنات تربى دقنها "

فرافيرو وسوبرمان وباتمان وبوجى وطمطم وبكار وغيرها من الشخصيات المغامرة، ظلت لسنوات طويلة تشكل نماذج يتقمصها الأطفال فى ألعابهم وخيالهم واهتمامهم، لكن فجأة تغيرت ألعاب الأطفال وشخصياتهم الخيالية لتتحول إلى عمرو موسى وشفيق وصباحى وأبوالفتوح، وبدلا من شعار فرافيرو المعروف «أنا جاى» وأغانى بكار وبوجى وطمطم، أصبح الأطفال يهتفون فى ألعابهم بألفاظ متلعثمة: «يسقت يسقت حكم العسكر»، و«الشعب والجيش إيد واحدة»، و«الشعب يريد إسقاط ماما».
منصور محمد سائق توك توك يروى للركاب مندهشا حوارا بينه وبين ابنته التى لم تتجاوز العاشرة عندما سمعته ابنته وهو يقول سأنتخب محمد مرسى فتدخلت وقالت له: «مرسى ده استبن»، فلما سألها عن سبب ما قالته قالت: «يا بابا ده لو جه هيخلى البنات كلها تربى دقنها»!
محمد عاطف الشهير بحمادة «6 سنوات» يسير ممسكا علم مصر، ويخرج كل يوم ليلوح به للمارة من البلكونة علق على ما يحدث فى مصر قائلاً: «اللى بيحصل ده مزهلة». وأضاف حمادة: «أنا عايز الرئيس الجديد يوفرلنا المصاريف»، ويرفع يده لأعلى ويقول: ده كيلو السكر بستة جنيه بعد ما كان بجنيه «حسبو» الله ونعم الوكيل. ويبدى حمادة مخاوفة من البلطجية بعد أن يروى لنا كيف شاهد شخصا يخطف شنطة من فتاة فى الشارع ويقول: «المفروض فيه شرطة فى البلد تحمينا»، وعندما سألناه: «تحب مين يبقى رئيس؟» أجاب: «أنا كنت بأحب أبوالفتوح بس هو ما ينفعش رئيس لأنه طيب والبلطجية ما ينفعش معاهم الطيبين وعموما مبقاش قدامنا غير الاستبن والفلول».
«طب وماما رأيها زيك كده يا حمادة؟»، هز حمادة يده فى يأس وتنهد وقال: «لا ماما ملهاش فى الكلام ده، ماما بتحب الخروجات والفسح».