استنكر الكاتب والسيناريست، بلال فضل، صباح الجمعة، فرحة جماعة الإخوان المسلمين بارتفاع مؤشرات مرشحهم الدكتور محمد مرسى، فى الانتخابات الرئاسية. وكتب فضل، عبر صفحته على موقع "تويتر"، "الإخوان فرحانين بمؤشراتهم، بس لو كان عندهم عقل كانوا عرفوا أنهم غلطوا غلطة عمرهم، ده نص اللى انتخبوا شفيق عملوا كده من كراهيتهم لهم". وقال فضل: "الحمد لله كل المؤشرات تقول إنى هاستمر فى موقع المعارضة طول الأربع سنين الجاية، بصراحة ده ألطف بكتير، التأييد بايخ. وأوضح فضل، أن الثورة لا علاقة لها بالانتخابات، مشيرا إلى أن العملية الانتخابية "لعبة سياسة"، مضيفا: "الثورة أصلا أكبر نجاح لها، إن بقى الناس حقها تختار، حتى لو ماعجبكش اختيارهم، مالكوش دعوة بالثورة". وأشار فضل، إلى أن "وراء كل صوت لشفيق تآمر من المجلس العسكرى لتكريه الناس فى الثورة، وإعلام مضلل يخوف من الإسلاميين، بس كمان وراه ثائر ماعرفش يتواصل مع شعبه". وبكتاباته الساخرة المعهودة، تحدث فضل قائلا: «كل اللى طالبه من الفريق شفيق البطل المغوار، أو مرسى الرئيس الأصلى، إنهم يمنعوا ضباط مصلحة السجون من أى تأخير لوصول أدوية السكر، عيان يا بيه". وأكد فضل، أنه لا يوجد أى رئيس يستطيع تحدى مطالب الثورة من عيش وحرية وعدالة اجتماعية، مضيفا: "الثورة ملك للشعب كله، واللى شايفها ملك ليه هو حر فى اختياره". وتابع: "أنا خصم سياسى للإخوان بس مش فاهم حالة المناحة اللى بتصور إن الثورة ضاعت"، مضيفا بسؤاله: "هما الإخوان كانوا مع مبارك ضد الثورة ولا أنا فاهم غلط". واختتم فضل تدويناته القصيرة، بقوله: "مش ضد إنك تلطم وتولول بس بعيد عنى الله يكرمك، أنا مابشوفش الحياة معركة واحدة بل سلسلة معارك، ومؤمن بحق تقرير المصير للشعوب".