قالت الفنانة انتصار، "الحياة كفاح مش جاية ع المرتاح" دا عنوان قصتى، ولايق عليا، مشيرة إلى أنها ظلت فى الكلية 13 سنة، وخلفت وأنا فى الكلية وكنت بروح لجنة الامتحان وأنا بطنى قدامى، وانصح كل بنت ناوية تتجوز تخلص الكلية الأول". وأضافت انتصار خلال استضافتها ببرنامج "ع المسرح" الذى تقدمه الإعلامية منى عبد الوهاب، والمذاع على قناة "الحياة": واجهت عرقلة كتيرة فى الحياة منها الفلوس وقلة اهتمام المخرجين بيا، مشيرة إلى دورها فى فيلم "سهر الليالى" خطوة مهمة خلتنى عديت المرحلة". أكدت انتصار، "رميت مشاكلى مع الآخرين ورى ضهرى، وعلشان أبقى نفسى لازم اتخلى عن حاجات كتيرة، مش هجامل كل الناس، ومن زمان منتجت ناس فى حياتى، وانا دمى خفيف وبحب الحياة". وقالت انتصار، والدى حافظ للقرآن وزاهد فى الحياة وصعيدى وانا متمردة دائما، مؤكدة أن الصعايدة لديهم تفتح عقلى ونفسى غير عادى، والجدة فى الصعيد بتحكم على رجالة، ولو الراجل مدايق الست يطلع عينه، والست غالية جدا هناك ولها قيمة". وأكدت انتصار أن الصعايدة بيحترموا الست ولها وزن، وبيسمعوا رأى الست، واللى فرحانين بيا أهلى اللى فى الصعيد، موضحة أن "والدها كان متخوف فى الأول من عملها ممثلة، ولما بدأ يشوف أخبارى فى الصحف فرح، وأمى كانت داعمة ليا ودعمها واضح عكس والدى، موقفه ودعمه مكنش واضح وسابنى اتحمل اختيارى". ولفتت انتصار، "بلبس قناع "لا تعليق" عشان أدارى ردى على شخص معين أد إيه انا بحتقرك وملكش قيمة، لافتة، اللى بيتصور معايا ويحط إيده على كتفى بعتبرها وقاحة، انا مش مستباحة، ولو حد قريب منى وزعلنى هرد عليه أو أخده على عيبة ومردش". وأضافت انتصار: كنا مطلوبين للزواج وزهقنا واكتفينا، وعمرى ما أخاف أكون مرغوبة أو غير مرغوبة، ولو أعجبت بحد باخد مبادرة، ودائما الراجل اللي بيحبك بيتكلم عنك ورا ضهرك حلو، وآخر مرة حبيت فيها كانت من وقت طويل، والحب بيغير الحياة بتحس اني الأكل له معنى واللبس له معنى ودولابك اللي في البيت له معني". ووجهت الإعلامية مني عبد الوهاب سؤال للفنانة انتصار قائلة:كاملة أبو ذكري قالت انك ممثلة شاطرة جدا، بس مش هتشتغل معاكي تاني لانك غير منضبطة، لترد عليها قائلة:"أتمني أن المخرجة كاملة أبو ذكري متتكلمش كتير في البرامج لانه مش صح، مينفعش كل شوية تطلع علي الناس لاني مبحتش انها عملت كدا، وبراحتها مشتغلش معايا تاني". وأكدت انتصار: "انتي مخرجة كبيرة ليكي اسم مينفعش البرامج تستغلك، وتطلعي تتكلمي عن زملائك وحش، لأنك من أهم المخرجين الموجودين في الشرق الأوسط، وانا بحبها جدا لأنها صحبتي". وعن جدل تعليم انتصار وباسم سمرة التمثيل لنيللي كريم فى مسلسل "ذات"، قالت :"انا قولت كدا عشان باسم سمرة طلع وقال في لقاء اني انا وانتصار علمنا نيللي كريم التمثيل، وانا اتزنقت في لقاء بعدها على طول، وقولت ساعتها مكنش يقصد هو كان قصده انه في الفترة دي كنا بنمثل بقالنا فترة طويلة، وهي حينها كانت راقصة شاطرة، كانت بتلعب بالية حلو جدا، وعجبني ساعتها اني نيللي كريم مردتش خالص واحترمتها جدا".
