بهلول البلوطى

صعد إلى سطح منزله بعد جهد جهيد.. نظر باستغراب فقد وجد أم مجاهد جالسة على الأرض ممددة الأرجل تقوم بتزغيط بطة.. إيه إللى طلعك ياحاج..؟؟ أنتى إيه اللى بتعمليه ده!!.
مجاهد قاللى نفسى فى البط.. وأنت طبعا عارف البطة بقت بكام النهارده.. وأنا إيه اللى عرفنى..!! آخر مرة أكلته مش فاكر إمتى.. ومجاهد بدل ما يتأمر يروح يشوفله شغلانة أحسن.. بلا بط بلا كلام فاضى.. وأنا أقول ايه ياربى الريحة الزفت اللى مالية البيت دى.. أنجزى ياحاجة وانزلى أعمليلنا كبايتين شاى.
أخذ أبو مجاهد موقعه المعتاد متربعا فوق الكنبة وقام بفتح التلفاز.. ولم تكد شاشته تضئ حتى وجد من يقول وهو يغمز بعينيه وويرفع أصابع يديه.. هو يعرف يزغط بط.. يعرف دكر البط بكام النهارده..؟؟
فى دخول أم مجاهد من الباب.. تعالى ياحاجة.. الظاهر يوم البط النهاردة.. بط إيه ياحاج.. هو فيه حد من الجيران مربى بط غيرنا.. أخذ أبو مجاهد ينظر إليها بتركيز وتمعن.. فيه إيه ياحاج.. خير.. تنهد أبو مجاهد وهو يقول لها.. خلاص.. خلاص أيه ياحاج..!! عايزنى أدبح دكرين البط اللى على السطح.. دكرين أيه بس يا حاجة.. الموضوع أخطر من كده بكتير.. أنا خلاص قررت.. قررت إيه بعد الشر.. خلاص يا ستى قررت أنك تترشحى للانتخابات..انتخابات..!! انتخابات إيه يا حاج؟ قالتها أم مجاهد وعلامات التعجب تعلو وجهها وهى لاتستوعب ما يقوله زوجها.. انتخابات الرئاسة يا حاجة.. رئاسة إيه يا حاج..!! أنت بتتمسخر عليا..حاشا لله.. أمال أيه أنا مش فاهمة حاجة..؟؟!! الدكر ياحاجة.. دكر إيه ياحاج أنت هتجننى..!! إنتى مش عارفة قيمة نفسك ياحاجة.. أهم مؤهلات المريسة موجودة عندك.. مؤهلات إيه ياحاج..!! ما قلتلك ياحاجة.. أولا بتعرفى تزغطى بط.. وكمان عارفة دكر البط بكام النهاردة.. وتفتكر يا حاج دول كفاي للمريسة..؟ كفاية..!! كفاية جدا ياحاجة.. وبعدين متعلمة.. دارسة وقارية ومعاكى ابتدائية قديمة.. لأ ياحاج أنا طلعت من خمسة ابتدائى.. الله وهى دى بسيطة يا حاجه.. خلاص اللى تشوفه ياحاج.
قام بتغيير القناة ففوجئ بشخص جالس واضعا ساقا فوق ساق وهو ينظر لمحدثه بكل كبرياء وتحد وهو يقول.. البلد دى محتاجة دكر.. وعلشان كده أنا مرشح نفسى.. بادرها أبو مجاهد وهو ينظر لها بتفحص شديد وعلى وجهه ابتسامة صفراء.. شفتى ياحاجة.. مش قلتلك.. قصدك إيه ياحاج..!! لأ ياحاجة ما تحطيش فى بالك. ما تغير لنا القناة ياحاج.. أنا خلاص اتخنقت من سيرة الدكر دى.. شوف سيرة غيرها.. قام بتغيير القناة.. ظهر رجل يخرج مسرعا من بوابة حديدية سوداء يرتدى نظارة سوداء لم تفلح فى إخفاء ملامح وجهه المتجهم يحيط به المئات من الجنود ممن يلبسون قبعات زرقاء وحمراء والمذيع يقول وغادر المقر بعد تقديمه أوراق طلبه الترشح للرئاسة.. يا نهار أسود..!! قالها أبو مجاهد وهو مذهول.. كفالله الشر ياحاج.. أسود..!! أسود ليه..؟؟ مين ده ياحاج..؟؟ ماتحطيش فى بالك ياحاجة.. اللى تشوفه ياحاج.
سمع صوت المفتاح فى الباب .. لحظة وكان ابنهم مجاهد يتوسط الصالة.. مساء الخير وجلس بجوار أمه..أزيك ياحاج..الحمد لله..قالها أبو مجاهد وهو يتحاشى النظر ناحية ابنه..تجاهل مجاهد الأمر وهو يتظاهر بانشغاله بالنظر على شاشة التلفاز التى كانت ما تزال تذيع خبر المرشح الجديد وما كادت صورة المرشح تتوسط التلفاز حتى قال مجاهد..يا نهار أسود..!! تصاعد صوت أم مجاهد وهى تقول هو أنت وأبوك ماواراكوش النهارده إلا السواد..!! ما حد يفهمنى.. قال لها مجاهد ما تحطيش فى بالك ياحاجة.. وقفت وهى تنظر إليهم بضيق.. خلاص.. خليك أنت وأبوك هاروح أعمل العشا.
شفت يا حاج..هى دى آخرتها..!! كأنك يا أبو زيد ما غزيت.. أمال ثورة إيه اللى قامت.. ثورة إيه ياابنى..!! أحنا صدقنا نفسنا أنها ثورة.. دى كانت انقلاب شعبى على حاكم وابنه وشويه حواليه.. قعدت الناس تهتف وصوتها أتنبح الشعب يريد إسقاط النظام.. الشعب يريد إسقاط النظام وفى الآخر لا نظام سقط ولا حاجة.. اللى سقط عشرين تلاتين نفر.. أما نظام الفساد فقاعد ومربع.
عندك حق.. أنضحك علينا ياحاج.. لأ يامجاهد.. أحنا اللى ضحكنا على أنفسنا.. نفسنا كان قصير وقلبنا الموضوع هزار والثورة الضاحكة والعالم نطت فوق الدبابات بالبوس والأحضان وبعدين قعدنا نخبط فى بعضنا.. مين اللى قام بالثوره ولمين الفضل وقعدوا ينفخوا فى الشباب وثورة الشباب.. ودخلنا فى معارك خسرانة.. محمد محمود وبور سعيد وغيرها.. الشمل أتشتت والكل قعد يشوف نصيبه فى اليغمه واللى ماطلش منها حته زى حلاتك يامجاهد قعد يخبط فى الإخوان والسلفيين اللى مننا وعلينا.. لغاية ما شكلها أتشفطت رسمى نظمى وأحنا قاعدين نتفرج والظاهر الكل هاياخد الصابونه..!!
قعدنا نجمع ونطرح وآخرها المجلس قش..قلنا حظر سياسى على رموز ورجال النظام الفاسد..لاحظر حصل ولا يحزنون.. وده طبيعى هو فيه حد حيحظر نفسه..!!
فى دخول أم مجاهد تحمل صينية كبيرة بها أكواب من الشاى وسندويتشات.. قال مجاهد هو مافيش غموس ياحاجة..؟؟ زغرت له بعينها وهى تقول.. أتعشى وأنت ساكت أحسن لك.. ابتسم مجاهد وهو يسأل أمه.. أخبار الدكر إيه ياحاجة..؟؟ انفجرت أم مجاهد فى وجهه وهى تقوم لتغادر المكان غاضبه.. أنت هاتشتغلنى أنت وأبوك. انقضى فاصل بث نشرة الأخبار وواصل البرنامج فقراته.. عاد الرجل المنتفخ الأوداج وهو يقول صحيح أنا مش متعلم بس الحياة علمتنى كتير والعلم فى الراس مش فى الكراس وزى ماقلت.. المهم الواحد يكون دكر.. قهقه أبو مجاهد وهو يقول اللى عاملين دكوره كتروا ما شاء الله.. حاجة حلوة بصحيح.. والشعب فى الأخر هيبيض.. بس بيض مايفقسش.