مطلوب رئيس

من أصل طيب
مخلص لشعبه يكون حسيس
مطلوب رئيس مايكنش خاين
ولا حرامى ولا خسيس
مطلوب رئيس لشعب مصر
لاهوَّ م العسكر ولا م البوليس
مطلوب رئيس نقدر نحاسبه
بالشريعة وبالقانون
نقدر نحاكمه نعزله
لو للامانه يوم يخون
مش شرط أبدا شكله إيه
ولاسِنه كام لو حتى تحت الأربعين
مش شرط برده لون العينين
ولا حتى هو إبن مين
شَرطُه الوحيد يكون امين
مطلوب رئيس يعرف يخلى الناس
فى بلدى متوحدين
مسلم مسيحى أبيض وإسود
فى الحقوق والواجبات متساويين
مطلوب رئيس على العدا
يكون شديد
يضرب فوقيهم بيد صلبه
من فولاذ أو من حديد
مطلوب رئيس يقضى ع الفوضى
فى بلدنا ويطهرها م الفلول
يغرس الحب فى الجيل اللى طالع
عنده لمشاكلنا كل الحلول
مطلوب رئيس يكون زينا
يعنى مش من سكان القصور
عايش معانا لحظة بلحظة
كل همه هو شعبه لحد سكان القبور
مطلوب رئيس فطاره فول مش كباب
يعرف يشغل كل أولادنا م الشباب
مطلوب رئيس يقعد معانا ووسطنا
ونحسه واحد مننا
يسمع لنا وياخد فى كل الأمور رأينا
مطلوب رئيس يكون بينا قوى
ونضحى عشانه بعمرنا