الرئيس السيسي يفتتح مجمع مصانع الكوارتز بالعين السخنة.. يوجه رسالة للمستثمرين: "ما تضيعوش وقت المجمع فرصة جيدة وحريصون على إزالة أى المعوقات".. ويؤكد: المشروعات متاحة للمستثمرين المصريين والأجانب وفى البورصة

* الرئيس السيسى يدعو الشركة المنفذة لمصانع الكوارتز وإيطاليا للإسراع فى تنفيذ باقى مراحل المشروع
* الرئيس السيسي: حريصون على إزالة المعوقات أمام أى مؤسسة
* الرئيس السيسى يلبى أُمنية أحد ذوى الهمم بحضور افتتاح أحد المشروعات القومية
* الرئيس السيسي: ال 700 مليون دولار اللى صرفناه على إنشاء المصنع ستستعيده الدولة خلال 3 - 4 سنوات

شهد الرئيس عبد الفتاح السيسى، افتتاح مجمع مصانع الكوارتز بالعين السخنة، واستفسر الرئيس عبدالفتاح السيسى من رئيس الهيئة المصرية العامة للثروة المعدنية، عن تكلفة إقامة 4 قطاعات لمصانع الكوارتز، ليرد المسؤول قائلا: "700 مليون دولار.

وقال الرئيس السيسى خلال افتتاح مجمع مصانع الكوارتز بالعين السخنة: " كنا بنتكلم مع دولة رئيس الوزراء ووزير البترول إذا كان هناك معوقات، إحنا حريصين أن ميكونش فيه معوقات فى أى مؤسسة.. ولو عملت ال 4 مراحل بتقول إنهم هيتكلفوا 700 مليون دولار..الإنتاج المحلى بجيبوا من بره سواء صدرته أو استخدمته هوفر عملة.. طيب فوايض الدولار كام؟.. السؤال صعب صح؟.

وتابع الرئيس: "إذا مكنتش تترجم بالدراسة هو ده اللى ممكن نطلعه أو نجيبه، لو بستورد 4 منتجات من الموجودين هنا ليهم رقم لو وفرتهم.. بقول ده لينا كلنا الحاجات دى موجودة طوال سنين فاتت والموجود مش سر ومعروف عندنا والناس المتخصصة فى المجال، يعنى دى فرصة استثمارية بقولها للصندوق السيادى والمستثمرين والقطاع الخاص والمستثمرين الأجانب.. فرصة استثمار جيدة موجودة عندنا.

وأكمل الرئيس: "فيه ناس بتقول ما تدوا فرصة للقطاع الخاص يا دكتور مصطفى طيب ده بيتقال كده..ده محتاج ترويج ولقاء مع اللى بيتشغلوا فى المجالات التعدينية بصفة عامة ونقولهم فيه فرصة كويسة جدا الفرص دى هتوفر لمصر سواء كان عوائد مباشرة أن احنا بنستورد الكمية دى بعملة حرة أو بتصديرها ويبقا لينا دخل من التصدير ثم العوايد غير المباشرة بان احنا بنشغل ناس وبنعمل قيمة مضافة بدل ما بنطلعه مادة خام.

وقال الرئيس السيسي: "اذا كان المطلوب 700 مليون دولار لكن لو بصينا على أن احنا نقلل من الرقم المطلوب لعمل هذه المشاريع، الأصل أن هناك فرق فى الصناعات التحويلية وتجيب المادة الخام من بره وتعملها فى مصر وبعدين تستفيد منها وتصدرها، لكن طالما موجودة المادة الخام وبخرجه مادة خام مستفدتش من المراحل دي..لما احنا اخدنا القرار من 3 سنين نتحرك نعمله يمكن كتير ومستثمرين من داخل وخارج مصر بيقولوا ما تدوا فرصة للناس تعمله..وبقول الكلام ده مش سياسة بنتكلم بجد احنا محتاجين ده، أن كل الفرص الموجودة عندنا وبالمناسبة الفرص الموجودة عندنا مش كتير قوى، لكن على الأقل الموجود عندنا ناخد الحد الأقصى بتاعه".


وقال الرئيس عبد الفتاح السيسى، أن مجمع إنتاج الكوارتز يمثل فرصة استثمارية يجب استغلالها، متابعا: "عندما خدنا القرار ده من 3 سنين، وقلنا نتحرك فيه قالوا ما تدوا فرصة للناس تعمله، وإحنا محتاجين أن كل الفرص تبقى موجودة معانا".

وأضاف الرئيس السيسي: "الناس قالت 700 مليون دولار كتير للمشروع، وإحنا بنطلع نجيب بمليارات الدولارات حاجات أخرى، الرقم مش بسيط ولكن الرقم ده ولا حاجة بالنسبة للأرقام التانية اللى بنجيب بيها، أنا لو طلعت المادة الخام واشتغلت عليها، هشغل الناس وهعظم الإنتاج".

أضاف الرئيس السيسى، أن المبلغ الذى صرفته الدولة على إنشاء المصنع المقدر بحوالى 700 مليون دولار ستستعيده الدولة فى ظرف ثلاث أو أربع سنوات من عوائد المشروع، موضحا أن تكلفة إنتاج المصنع قد تظهر كبيرة لكن فى الوقت نفسه إذ لم تتخذ الدولة هذه الإجراءات "لن نتحرك إلى الأمام".

وأشار إلى أن تكلفة استيراد ما سينتجه هذا المصنع تكلف الدولة أموالا كثيرة لكن إذا عملنا على توطين هذه الصناعة سنوفر عملة صعبة بالإضافة إلى فرص عمل كبيرة للشباب.

وأكمل الرئيس السيسي: "أنا بقول لكل الناس والصندوق السيادى والبورصة المصرية، الحاجات اللى بنفتتحها متاحه للمستثمرين المصريين والأجانب، متاحة إنها تتطرح فى البورصة علشان ندى فرصة للمواطنين أن يجدوا فرصة للاستثمار فى مجالات أخرى وبعوائد مضمونة وهى فرصة أن يستفيدوا بأموالهم بشكل كبير".

وفى حديثه للمستثمرين الأجانب، قال الرئيس السيسي: "إحنا معاكم علشان تخشوا.. ولو عايزين تخشوا لوحدكم تمام، أنا قلت الكلام ده من أول مشروع الرمال السوداء، المشروعات كلها متاحة لكم تعالوا، المشاريع دى استثمارية بتجيب عوائد مستقرة سواء للسوق المصرى أو الخارج وبالعملة الحرة".

وأكد الرئيس السيسى، أن الدولة المصرية تحاول تعظيم الهيئة المصرية العامة للثروة المعدنية، قائلا "بندرس كويس جدا إزاى نعظم الهيئة المصرية، لتكون أكثر فاعلية وحركتها أكثر أمام البيروقراطية".

وتوجه الرئيس عبد الفتاح السيسى، بالشكر لكل من ساهم فى خروج مشروع مجمع مصانع إنتاج الكوارتز بالعين السخنة الذى يتم افتتاحه اليوم، متابعا: "بقول تانى لرجال القطاع الخاص والمستثمرين فى مصر، من فضلكم ما تضيعوش وقت تانى، وأى مشروع من اللى إحنا بنتكلم فيه، فرص نجاحه جيدة وفقا للبيانات، إحنا عندنا المادة الخام اللى ممكن تطلع من مصر ويتم تصنيع كل المراحل فى مكان واحد بكل ما يعنيه ذلك لتقليل التكلفة، وبقول تانى للمستثمرين وغرف الصناعة ووزير قطاع الأعمال ووزير الصناعة والتجارة والحكومة ولينا كلنا، مانضيعش وقت تانى أكتر من كده".

ووجه الرئيس السيسى، حديثه لشريف عبد الحميد اللبان، رئيس مجلس إدارة شركة الشريف براند، قائلا: "من فضلكم المراحل التانية فكروا جديا ومعانا السفير الإيطالى، وممكن نتصل على أعلى مستوى مع الحكومة الإيطالية لدعم هذا الاستثمار، بحيث نخرج فى أسرع وقت ممكن فى أن المراحل دى تخش الإنتاج والحركة بسرعة، ومن جانبنا إحنا هنوفر المكون المصرى مهما كان قيمته حتى ننطلق".

وأكد الرئيس السيسى فى حديثه لشريف عبد الحميد اللبان: "نحن ندعم الشركات ونشجع أن تقوموا وتعملوا المصانع وتساهموا فى المشروعات دى، علشان نخلص المشروع امتى.. امبارح".

واستجاب الرئيس عبد الفتاح السيسى إلى رغبة أدهم هشام أبو بكر "من ذوى الهمم.. قادرون باختلاف"، فى حضور افتتاح أحد المشروعات القومية التى تنفذ فى كافة ربوع مصر.. حيث طلب "أدهم" مصافحة الرئيس الذى لبى على الفور أمنيته فى لفته إنسانية من الرئيس.

وبعد أن صافح الرئيس، أدهم، خلال افتتاح مجمع مصانع الكوارتز بالعين السخنة فى محافظة السويس، أدار الرئيس حوارا أبويا وديا مع أدهم، وتم التقاط صورة تذكارية له مع الرئيس.