وصية شهيد

لمّا تستلمى شهادة وفاتى
زغردى
ما تعيطيش..
ما تبلّيهاش بالدموع
اعملى زيىّ تمام
اهتفى وسط الميدان
سمّعيهم
يا امّة صوتى
خلى أمة مصر تشهد
إن موتى
يوم بنشهد
فيه ميلاد مليون بطل
بيعيْد هتاف هز عرش الدكتاتور
...
زغردى
يا امّة يمكن!!
يعرفوا
إن الشهيد على نعشه عايش
روحه بتلف الشوارع
على رأس مسيرة
ضد حكم العسكريّة
أعلى من صوت الرصاص
رايته بيضه
راية تهزم بندقية
صوت إمام بيصلى
خلفه مليونية
...
زغردى يا امّة
بغنوة تهدّ سور الحزن فينا
وتبنى سور للكرامة الإنسانية
...
لمّا تستلمى شهادة وفاتى
ابعتيها
للى حاكم
فى المحاكم
والنيابة
والمشير فى العباسية
ابعتيها لاعتصامى ف الصينية
امضى يا امّة بنفس حُرّة
ع الشهادة بين قوسين
ثورتى ما بتنتهيش
ثورتى لازم تعيش
ثورتى دى مستمرة
...
لمّا تستلمى شهادة وفاتى
ضميها على صدرك
يا أمى أصلها شهادة ميلادى