يا نخلتنا

يانخلتنا راح فين منك لنا البلح
ياما فرحتى قلبى وبيكى انشرح
نسبوا البلاح ليكى وبيكى فلح
أنت السفينة بيكى الربان نجح
يحدفوكى بطوب ردك لنا رطب
واللى يحضنك ترفعيه للسحب
سبحان من أثمر منك لنا ووهب
التمر سكر آخره زى أول نخب
ربنا ذكرك والبتول فى القرآن
وأمرها تهزك رحمة من المنان
مين يهزك دى إشارة للكسلان
العمل سبب لنا الباقى للرحمن
ياما من بلحك شربنا منه عسل
أيام ما كنا بعد الفجر كلنا للعمل
وبلحك كان رحيق النحل للشفا
السبعة فى الصبح طب المصطفى
يعدى كل اليوم كأنه لحظة صفا
سباطك فى العالى لعنينا قناديل
والشفا منك قالوا فيه مواويل
جمار قلبك لقلوبنا حاجة تانية
سيف يقتل كل المرض فى ثانية
يا نخلتنا ليه جريدك لنا بلا سعف
لونوه وعملوا الطواقى والنجف
صنعوا المكرمية زينوا بها الغرف
وفى الفالنتين كتبوا بيكى الشغف
كل موسم ياما خدنا منك الجريد
منه الكراسى والكنب زى الحديد
تفوت السنين وجماله كأنه جديد
يا نخلتنا دلعوكى قالوا إنك مصر
قالوا إنك أم الدنيا فى كل عصر
أول حروفك محتواكى كله فخر
الصاد صمودك مقبرة لكل غدر
والراء ربنا يحفظك من كل شر
يا مصر يا نخلة فوق كل النخيل
اسمك باقى فى قلوبنا لا رحيل
تسألى أقول شموخك هو الدليل
قلبى بحبك اشتاق ليكى للفرح
أيدينا ليكى هتداوى اللى انجرح
وأداوى روحى منك بأحلى بلح