رصيدنا عندكم يسمح..!!

ياللى رصيدك كان يسمحلك تملى شروط الحب عليّه
وإما وافقتك تملى شروطك ليه عايز تتحكم فيّه؟
أنا ممنون لوقوفك جنبى وبقولك شكرا من قلبى
بس اسمحلى إنى أقولك خف عذابك عنى شويو
.......
أنا ضحيت لك أكتر منك حتى الروح شلتها على كفى
كنت شجاع ومقاتل عنك وشهمتى فى يناير تكفى
مبخلتش بحياتى ودمى ولا هزتنى دمعه من أمى
كان إصرارى بيغلب ظنك وحملت الشهداء على كتفى
.......
كنت أتمنى أشوفك أجمل من أحلامى ومن أيامى
كنت أتمنى أشوفك أنبل وبتسعى بقلبك قدامى
وأرمى حمولى وهمى عليك وأشوف الحق على إيديك
لكن اسمحلى وبلاش تزعل حبك كان أكبر أوهامى
.......
ياللى رصيدك كان يسمحلك تدخل قلبى بكلمه ونظره
بعد الصبر اسمحلى أقولك مانتاش قد أمالى فى بكره
ولا قد مشاعرى وطموحى اللى عشانها غامرت بروحى
واسمحلى من قلبى أقولك مانتش قد طموحى بالمرّه
.......
ياللى رصيدك كان يسمحلك إنى أصدق كل كلامك
واما أخاف على نفسى اندهلك ويطمنى وقوفى قدامك
بعد دا كله جرالك إيه؟ خليتنى أخاف منك ليه
واهرب منك لما بقابلك وأتمنى فراقك وخصامك
.......
ياللى رصيدك كان يسمحلك ليه خلصت رصيدك عندى ؟
ياما سهرت ليالى اقولك زى ما بديك لازم تدى
كانت إيدى وإيدك واحدة كنا لبعض حنان وموّدة
بعد القسوة اسمحلى أقولك إنى رصيدك خالص عندى
.......