جبت التذاكر

ياغربة لابايدى اختارتك ولا بهوايا
كارهك ومن قلبى بقولها ومن جوايا
آن الآوان ابعد همك عن دنيايا
آن الآوان إنى أقولك بس كفاية
أيام وسنين بتجرى وأنا داير كالسواقى
سرقتى أحلى عمرى وعينك ع اللى باقى
لو كان الأمر أمرى ماكان بينا تلاقى
أنا عشتك غصب عنى وح افوتك باشتياقى
أنا ماشى وعايز أقولك مش ح اقبل ارجعك
مفيش فى القلب حاجة يا غربة ح تنفعك
لا أنا عايز أحكى عنك ولا أشوفك أو أسمعك
دا أنا م اللى شوفته منك مستخسر أودعك
تعبت يا غربة منك والقلب معدش قادر
يتحمل تانى غربة ويعيش على طول مهاجر
يا تاريخ ح أرميه ورايا انسينى وابقى شاكر
لا متحاوليش معايا خلاص جبت التذاكر