أول رد من القبطان المصرية مروة السلحدار على شائعة قيادتها للسفينة الجانحة بقناة السويس

عبرت أول سفينة للمجرى الملاحى لقناة السويس بعد عودة الملاحة بعد تعطلها فى بعد جنوح سفينة الحاويات البنمية EVER GIVEN والتى تتبع الخط الملاحى EVER GREEN، فى المنطقة 151 ترقيم القناة، خلال عبورها لقناة السويس ضمن قافلة الجنوب فى رحلتها القادمة من الصين والمتجهة إلى روتردام.
ووجه الفريق أسامة ربيع، رئيس هيئة قناة السويس، فى بيان رسمى صادر عن الهيئة، رسالة طمأنة بشأن حركة الملاحة بالقناة وانتظامها مرة أخرى من خلال مجرى القناة الأصلية، مشدداً على أن قناة السويس لا تدخر جهدا لضمان انتظام الملاحة وخدمة حركة التجارة العالمية.

ومع أخبار جنوح السفينة انتشرت صورة للقبطانة المصرية مروة السلحدار، أول امرأة قبطان بحرى فى مصر وادعى البعض أن "السلحدار" هى من كانت تقود السفينة، وتعرضت لحملة ممنهجة وتشويه لها وشملت الحملة فبركة بعض الأخبار حول الواقعة حيث وصلت لحد التأكيد من هذه الجهات ان مروة هي قائدة السفينة.
تليفزيون اليوم السابع استضاف القبطانة مروى السلحدار للحديث عن تفاصيل موقع عملها وحقيقة علاقتها بالحادث

وقالت مروى فى بداية حديثها :" أنا بشتغل فى الأكاديمية البحرية الأكاديمية العربية للنقل البحرى فى الإسكندرية وبعمل على السفينة عايدة 4 وهى سفينة ملك لهيئة السلامة البحرية والحكومة المصرية والتى تديرها الأكاديمية العربية للنقل البحرى وبقالى 8 سنين شغاله على المركب دى وطلعت فى أكثر من حوار قولت الكلام ده.. حاليا أنا موجودة موقعى فى الإسكندرية علشان شغلى وعندى إيفنتات أونلاين.. فأنا مليش دعوة باللى حصل ده.. والمركب الجانحة دى أو الشركة المالكة أنا لم أعمل معهم من قبل.. والخبر ده نزل من 4 أيام على موقع arab news وكانوا بحتفلوا أن فى مرأة مصرية وصلت لرتبة كابتن فى المجال البحرى .. والكلام المكتوب اتاخد واتكتب بطريقة تانية.. قبلها بيومين اتعملى أكونت مزيف على تويتر وأخد فولورز كتير وكان بينزل أخبار عن لسانى.. فانا مش فاهمه ليه بيحصل كده طبعا بس كل اللى أقدر أقوله إن موجود ناس تقدر ترد على الكلام ده"

وأضافت: "الناس اللى بتعمل كده بتحاول تؤذينى في مجهود أنا تعبته سنين.. هو مش فاهم الخبر ومعناه.. هو مش فاهم انه فى متطلبات علشان تعدى سفينة فى قناة السويس.. وبيكون فى مرشد تبع هيئة قناة السويس بيكون متواجد على المركب خلال عبور القناة وبيكون ناصح لقائد السفينة اللى بيتحمل كل المسئولية.. فاكيد الناس اللى بتقول الكلام ده مش فاهمين وعندهم جهل بمجالنا تماما وانتوا مشكورين انكو بتوضحوا الحقيقة طبعا.

وتابعت: "أنا الخبر وصلى عن طريق صحابى علشان هما عارفين انه مش حقيقى وقالولى حاولى تكدبى الخبر بأى طريقة.. معرفتش أوصل لمصدر الموضوع نفسه أو الخبر.. شايفه الموضوع من ناحيتين الأول كنت مخضوضه ان في حد بيؤذينى في مستقبلى لان انا تعبت كتير علشان أوصل للحتة اللى انا فيها.. ان حد ببوست قد إيه هو بوست صغير وتافه ممكن يضيع مستقبلى .. فحسيت انه السوشيال ميديا ممكن تضرك جدا. وبصيت للنص التانى ولقيت ناس بترد وبتقول ان ده لا ده مش حقيقى وان هي معملتش كده وان حتى لو هي السبب في كده فهى ممكن تحصل لان في حوادث بتحصل فى البحر عادى.. فالحقيقة أنا لما لقيت ناس كتير بتدعمنى بطلت أتضايق لكن بحاول أفهم ممكن مين اللى بيعمل كده أو إيه مصلحته انه يأذى حد كده "

واختتمت مروى حديثها لتليفزيون اليوم السابع قائلة: "شكرا جدا على دعمكم ليا وان انتوا بتظهروا دايما حقيقة الخبر.. متشكرة جدا وأتمنى ان الناس تفهم إن أنا مليش دخل خالص بالقصة اللى حصلت دى.. والغريب إن أنا من سنتين اتكرمت فى نفس اليوم إن أنا أول مرأة مصرية فى المجال ده.. فا أنا مبسوطة جدا أنى كنت معاكم".

وعن أسباب جنوح السفن قالت": "الوقت ده من السنة فى رياح خماسينية وممر قناة السويس معرض للعواصف الرملية ورياح شديدة جدا.. ودى بتحصل مش بس فى قناة السويس دى بتحصل في كل الممرات المائية فى العالم.. وممكن يكون فى عطل فى المركب .. فالأخطاء وارده فى أى مكان.. وبيكون فى إجراءات الطوارئ والحوادث معروفة لكل العالم بتتنفذ.