طمأنت الإعلامية لميس الحديدى الجمهور على الحالة الصحية للإعلامى عمرو أديب بعد تعرضه لحادث مرورى مساء الثلاثاء الماضى، قائلة: "عاوزة أتكلم فى موضوع مالوش علاقه بالشغل، عاوزه أطمن كل الناس اللى بتسأل على عمرو بعد الحادثة الصعبة اللى تعرض لها مساء الثلاثاء الماضى، أنه الحمد لله بخير ربنا نجاه بأعجوبة، لكن هو لسه بيعانى من آلام شديدة. وكشفت لميس الحديدى خلال برنامج "كلمة أخيرة" الذى يذاع على قناة on عن هوية أربعة شباب كان لهم دور كبير فى إنقاذ زوجها الإعلامى عمرو أديب للمستشفى وإنقاذه، قائلة : " أنا هنا سأخص بالشكر 4 شباب بالاسم لانهم هم دول اللي نقلوا عمرو المستشفى بعد الحادث مباشرة و فضلوا معاه لحد ما انا وصلت مباشرة، وهم المهندس مصطفي عزب، د كريم النحاس، د طارق سلامة، المهندسة داليدا . الشباب دول أنا ما اعرفهومش، لكنهم تصادف وجودهم في نفس مكان الحادث ونقلوه المستشفى و فضلوا معاه لحد وصولي وكملوا معايا لحد ما اتطمنوا عليه، الشباب دول انا صممت اخد أساميهم علشان اشكرهم بنفسي، فيه لسه ناس محترمه بجد".
وتابعت: " انا طبعا ماكنتش حاقدر انزل الشغل أو أكون معاكم إلا وانا مطمئنة عليه أنه بيتماثل للشفاء وأن حالته تسمح اني اسيبه بعض الوقت، لآن في مثل هذه الأحداث دورى كزوجة بييجى قبل دورى كإعلامية".
ووجهت الشكر للجمهور ولكافة المسؤولين في الدولة، قائلة: " عاوزة اشكر كل الناس اللي سألوا علينا وعليه من أصغر حد لأكبر حد، من الجمهور البسيط اللي كان بيبعتلي رسائل ودعوات وشمع في الكنائس، لأكبر مسئولين في البلد باشكرهم جميعا، زملاءنا الإعلاميين، الفنانين من كل الوطن العربى، الدكاترة اللي كانوا بيكلموني، و طبعا أصدقائي وأصدقاء عمرو اللي ماسابونيش لحظة واحدة، باعتذار اني ماكنتش برد علي الاتصالات، لكن ممتنين جدا لاهتمامهم، وحبهم اللي حسينا بيه".
