زوجة عبد الرحمن يوسف لعمرو أديب: عائلة القرضاوى مش بتصرف على أولادى ولا مليم

قالت مروة عاشور زوجة عبد الرحمن يوسف القرضاوي، عن زوجها بعد طلبها الطلاق: أنا مش عارفة هو يعرف مين بس هو دائما كان بيقول إنه يعرف ناس في مكتب أردوغان وعارفة أنه ليه علاقات مع حد في المطار لكن يعرف مين بالضبط مش عارفة، مضيفة: أنا كلمت كل أخواته وكلمت أخوه قبل ما أرفع قضية ب12 يوما وما حدش تواصل معى، وأخته قالت إن الأولاد مالهمش ذنب وهنبعتلك فلوس علشان الأولاد ولم تتواصل معى.
وأضافت خلال مداخلة هاتفية مع الإعلامى عمرو أديب ببرنامج الحكاية: عائلة يوسف القرضاوى مش بتصرف على أحفادها ولا مليم وحياة أولادى هي قالتلى هبعتلك مصاريف المدرسة وما ردتش عليا وعايشين من النفقة البسيطة اللى بيدفعها وواحدة من البنات جالها ديدان في بطنها من سوء التغذية، وأنا ممنوعة من إنى أكلم يوسف القضاوى وهو مش معاه تليفون وسمعه ضعيف ولا أعرف هل هو يعرف المشاكل اللى أنا فيها ولا لأ، وتواصلت مع الديوان الأميرى في قطر وما اعرفش هما وصلوا لإيه .
واستطردت: هناك شخصين تواصلوا معى وساومونى أنهم يدفعوا كل حاجة مقابل إنى ما أنزلش مصر وهما عايشين في تركيا بعد الفيديوهات التي نشرتها، وأنا مستحيل آمن على نفسى في هذه البلد وعرضوا عليا دولة عربية تانية ووافقت لأنى كنت عارفة إنه هيرفض، انا محرومة من بلدى ومن شغلى، والسفارة قالتلى شيلى المانع من السفر علشان نعرف نسفرك من وقتها وأنا بحاول، بنتى الكبيرة بتعيط كل يوم علشان تنزل مصر وهو واخد مننا العربية.
وأكملت: الفكرة إنه مش عاوز يطلقنى بقاله سنين طول عمرى ما عملتش حاجة غلط مع عبد الرحمن وعائلته وأتعامل بتربيتى، أنا فضلت اتحايل على عيلته 6 شهور كاملة وهذه حياة غير أدمية علشان أعيشها، هناك شيء خاطئ وانا بعت الفيديو الأول للجزيرة ومحدش كلمنى خالص ومش انا اللى بعته شخصيا خالى هو اللى بعته لكن ما حدش سأل وطبعا الشرق وكل الناس دى متخيلة إنى كذابة وكل حاجة عندى بالأدلة وهما لم يحاولوا التواصل معى .