قناوى يبحث عن هنومه

بعروق نافرة ووجه مزدرد ونظرة عابسة كان يهتف بأعلى صوته.. كرامة.. حرية.. عدالة.. الثورة تاهت يا ولاد الحلال.. تنبه لمجموعة من الأشخاص يقتربون منه ببطء وأحدهم يشير إليه.. فرد آخر ذراعيه على الجانبين وهو يحرك كفيه للأسفل بحركة يوقف بها الآخرين من التقدم نحوه ثم همس فى أذن أحدهم ببضع كلمات.. تقدم نحوه رجل عجوز تملأ وجه التجاعيد.. الشعيرات القليلة على جانبى رأسه حالكة السواد..!! يحمل فى يده قميصا أبيض.. اقترب منه وبصوت متهدج أخذ يحدثه.
قناوى.. قناوى يا ابنى.. رد عليا.. أنا أبوك مدبولى.. نظر إليه باستغراب وهو يقول قناوى مين ياعم وأبويا مين ياعم ..!! استمر الرجل وكأنه لم يسمع شيئا.. أنت زعلان ليه.. دنا هجوزك هنومه وهكتبلك عليها الليلادى.. ازدادت نظرة عينيه اتساعا وهو يقول هنومة مين ياعم..؟؟ أيه اللى أنت بتقوله ده..!! استطرد الرجل.. المهر جايبهولك معايا فى جيبى أهه.. بس أوعى عن سكة القطر.. تلفت حوله وخلفه وهو يقول بصوت مبحوح.. قطر مين ياعم..؟؟ وكأنه لم يرد عليه.. الليلة فرحك يا ابنى وأنا هكون من الشهود.. اقترب أكثر وهو يقول له أنت مش مصدق..؟؟ أصبح الرجل فى مواجهته تماما.
أنت عايز إيه يا عم أنت وقناوى مين وهنومة مين وأنت مين أصلا..؟؟ بعيون حانية ونظرة هادئة.. قال أنت يا بنى اللى عايز مش أنا.. يا عم أنا عايز كرامة وحرية وعدالة مش هنومه..!! أنت أكيد غلطان.. أبدا يا بنى..هية هية.. ما تفرقش.. المهم اللى أنت عايزه معايا وطلبك جاهز.
أصابته حالة من الذهول والدهشة ولم يجد ما يرد به عليه وبحركة سريعة أدخل الرجل القميص فى يديه وانقض علية العديد من الأشخاص.. وضعوه فى صندوق عربة انطلقت به مسرعة.. دقائق ومرقت العربة من خلال بوابة حديدية عالية.. سارت فى طريق طويل تحيط به أشجار كثيفة حتى توقفت وأنزلوه.
أدخلوه غرفة واسعة فى جانب منها مكتب أمامه كرسى أجلسوه عليه.. فك أحدهم يديه وهو يقول شوف يا قناوى خليك هادى وظريف بدل ما نلبسك القميص تانى.. نظر إليه ولم ينطق.. لحظة ودخل الغرفة رجل يرتدى بالطو أبيض مشمر الأكمام يبدو كطبيب..عينيه تبدوان ضيقتين جدا من خلف زجاج نظارته السميك.. قال بصوت خشن.. جبتوه إمتى ده..؟؟ هو يومه..إحنا مش فاضين النهاردة ورانا إضراب.. خلصنا يا ابنى ورد على الأسئلة بسرعة.. السؤال الأول.. هل أنت رجل أم سيدة..؟؟
انفجر فى وجهه.. إيه يابا التهريج ده.. هو فيلم..؟؟ شكلك هتتعبنا يا قناوى..خلاص أن شاالله ما عنك جاوبت.. عموما حالتك واضحة ومش محتاجة كلام كتير.. خده يا سيد على عنبر تمانية.
مشى معهم مستسلما مذهولا لا يصدق ما يجرى له.. لا بد أنه فى كابوس ينتظر أن يفيق منه.. فتحوا قفل باب كبير ودفعوه داخل الغرفة ثم أغلقوا الباب ورائه.
وجد المئات من البشر داخل العنبر بعضهم يجلس على الأسرة وبعضهم مفترش الأرض.. لم يلتفت إليه أحد منهم..!! وقف محتارا لا يعرف ماذا يفعل..!!؟؟ انتفض وهو ينظر خلفه ليرى من صاحب اليد التى وضعت على كتفه.
وجد من يبتسم له ابتسامة رقيقة.. رجل يبدو وسيما يشتعل شعره الناعم المنسدل على جبينه بياضا.. ربت عل كتفه..اهدى يا ابنى وما تخفش.. أخذ بيده وأجلسه بجانبه على سرير بجانب الباب.
قولى الأول إيه اللى جابك هنا.. كنت باهتف بالحرية والعدالة والكرامة.. اتسعت عينا الرجل وهو يقول كل دووول..!! يابنى أنا طالبت بواحدة بس منهم من خمسين سنة جابونى هنا ومن ساعتها ماخرجتش.. ياعمى الدنيا اتغيرت.. زمنا غير زمانكم.. فهمنى بالراحة واحكيلى قصتك من الأول.. استمع الرجل لما برويه بانتباه شديد لم يقاطعه ولكن بين الحين والحين كانت تظهر على وجهه علامات الدهشة والتعجب.
يعنى أفهم منك أن فيه ثورة قامت؟؟ هز رأسه يالإيجاب.. تنهد الرجل وهو يقول.. عجيب..!! واللى قام بالثورة الشعب..!! هز رأسه بالإيجاب..علا صوت الرجل..عجيييب..!! طيب مين زعيم الثورة دى..؟؟ لأ الثورة دى مالهاش زعيم.. رفع الرجل حاجبه الأيسر وهو يقول غريبة..!! ومين بقى اللى ماسك الحكم دلوقتى..؟؟ قال له الجيش.. رفع الرجل حاجبيه.. هو الجيش لو قام بالثورة يمسك ولو ماقمش بالثورة يمسك برضه..!! يا ابنى الثورة اللى مالهاش زعيم ولا تحكم ولا تقوم بتغيير الأوضاع اللى قامت علشانها ليست بثورة.. التاريخ بيقول كده.. أمال اللى حصل ده تسميه أيه..؟؟
فجأة قفز أمامهما شاب أشعث الرأس.. أخذ يبحلق فيهما وحوله وهو يصيح ويهتز راقصا.. ما ادونيش جايزة نوبل ليه..؟؟ أنا كخة ولا أيه.. كتابة فى الفيس وكتبت.. هتافات وهتفت.. غرز فى راسى وأخذت.. معتقلات واعتقلت.. ضرب على القفا وانضربت.. قول أنا مره وقلت.. ثم انفجر فى بكاء هستيرى.. نظر إليه بحسرة وهو يحدث نفسه.. ناقصك أنك ماطلعتش فى التليفزيون تعيط.. ولا برامج استضفتك ولا فيه حد مستخبى وراك ولا قدامك.. ولو قعدت تلطم للسنة الجاية محدش هيعبرك..!!
لحظة وعلا صوت أحدهم بصراخ مستطير.. فين هنومة ياولاد ال...ب.. جبتونى هنا ولاهنومه شفت ولا دخلة دخلت.. كان صوت تساؤله مسموعا وهو يحدث نفسه.. هما كمان قالوا له هنومه..!!؟؟ رد الرجل ذو الشعر الأبيض وكأنه يحدث نفسه أيضا.. شوف يا ابنى كل واحد فى الدنيا له هنومه بتاعته.. وهنومتك ممكن ترفعك للسما وممكن تجيبك هنا.. دنيا ومتقسمة..!!
لحظات وساد ظلام دامس..!!؟؟ قال له الرجل ما تخفش.. ميعاد النوم.. تمدد مكانه مستسلما متوسدا يديه خلف رأسه وناظرا للأعلى.. من نافذة صغيرة أعلى الحائط كان القمر يبدوا بدرا يتوارى ضياؤه خلف سحب كثيرة تتحرك ببطء شديد.. أغمض عينيه على دموع انسابت على وجهه وهو يقول.. يارب.