حازم إمام: ياريت نرحم مروان محسن بلاش ندوس عليه زيادة كلنا بنغلط

طالب حازم إمام، نجم الزمالك ومنتخب مصر السابق، جماهير الكرة المصرية بالتوقف عن السخرية من مروان محسن مهاجم الأهلى بسبب أدائه فى مباراة القمة التى خسرها الأحمر بثلاثية من الزمالك، وقال الثعلب الصغير فى برنامجه وان تو عبر إذاعة أون سبورت إف إم، "تابعت حديث والد مروان محسن وشعرت أنه بجد كتير اللى بيحصل مع ابنه، وربنا يكون فى عونهم، كل الناس بتغلط بس حظ مروان أنه بيلعب فى الأهلى وكل الأضواء عليه، فياريت نرحم مروان محسن وكفاية اللى حصل".
وأضاف حازم إمام، "والد مروان زعلان من الشيخ طه إسماعيل ومن عماد متعب عشان انتقدوا مروان، هو كأب ليه حق ميحبش حد يقول أى كلمة عن ابنه، بس أى محلل لما ينتقد اللاعب كورة وفنيات ده طبيعى طالما الانتقاد لم يخرج عن حدود الاحترام، ولم يصل للاستهزاء والسخرية، وده ميزعلش حد، أنا ضد أنى أى محلل يسخر من أى لاعب ".
وتابع الثعلب الصغير، "ارحموا مروان محسن، هو طلع على المسرح لوحده فمش طبيعى ندوس عليه أكتر، كلنا عندنا أخطاء وقرارات غلط، وياريت نتعلم أننا مندوسش على حد جاب أخره".
وعن مباراة القمة قال حازم إمام، "كلام الشيخ طه مظبوط فعلا فايلر قبل السفر لسويسرا حاجة وبعد العودة حاجة ثانية، فعلا مش مركز، وأول مرة أشوف دفاع الأهلى كدا، وفايلر لم يخترع فى التشكيل هو أخطأ فى أدوار اللاعبين فى الملعب وكمان كان مضطر فى بعض الحاجات عشان الإصابات اللى فى الأهلى".
وأضاف حازم، "عجبنى هدف مصطفى محمد، من أجمل الأهداف ويشبه هدف دروجبا فى ليفربول، هدف فيه حرفنة وموهبة كبيرة وعجبنى كمان أداء أشرف بن شرقى، والمفاجأة بالنسبالى كانت من أليو بادجى مهاجم الأهلى، لم أتوقع أداءه فى المباراة هو متميز للغاية فى الكرات العالية بشكل كبير عن قدمه، ولازم جمهور الأهلى يقف مع الفرقة عشان اللاعيبة بقت بتشوف الانتقادات بعينها مش زى زمان فبلاش تخسروهم فى المباريات المقبلة نفسياً من قسوة الانتقادات".
وفى وقت سابق، علق محسن ثروت، والد مروان محسن، مهاجم الفريق الأول لكرة القدم بالنادى الأهلي، على عدم تفعيل الأهلى لعقد نجله الجديد.
وأكد والد مروان محسن فى تصريحات تليفزيونية : "مروان محسن وقع للأهلى من جديد ولو لم يتم تفعيل العقد فهما حرين" متابعا ابنى أهلاوى ويعشق الكيان الأحمر ولو عايز يروح الزمالك او بيراميدز كان راح".
وأضاف والد المهاجم الدولى إن ابنه يتقدم لهجوما ذريع وأنه خائف عليه قائلا ابنى لو جراله حاجة ساعتها المدربين اللى بينقدوه هيكون موقفهم ايه".
وتابع: "ابنى بيجتهد ومهذب وعمره ما بيغلط فى حد ولماذا يتم الهجوم عليه بتلك الطريقة مؤكدا ان من يهاجمونه مجرد صبية ومحليين هواه" وأن نجله نجم النجوم فى جميع المنتخبات بالمراحل العمرية".

حازم إمام
مروان محسن
الاهلى
الزمالك
الموضوعات المتعلقة
جامعة النهضة.. أكبر جامعة خاصة في الصعيد تمنح درجة البكالوريوس في 8 تخصصات.. فيديو
السبت، 22 أغسطس 2020 01:41 م
أحمد عيد عبد الملك ل تليفزيون اليوم السابع: أنصح مروان محسن بالانتقال لفريق آخر
الإثنين، 24 أغسطس 2020 12:15 ص
والد مروان محسن : الأهلى حر في تفعيل عقد نجلى.. ومن ينتقدون اللاعب صبية وهواة
الإثنين، 24 أغسطس 2020 12:13 ص
مدحت شلبى: مروان محسن يمكن أن يكون مهاجما لنادٍ أخر وليس للأهلى
الأحد، 23 أغسطس 2020 08:45 م
صور.. مروان محسن يفتعل أزمة في غرفة خلع الملابس بعد مباراة الزمالك ضد الأهلى
الأحد، 23 أغسطس 2020 07:35 م