لأ يا أفندم

هنا هاقولك على حاجات تحمي بيها نفسك من نفسك. لا محمد طه و لا محمد رشاد عثمان هيقولوهالك ( من اروع الكتاب النفسيين في الوطن العربي في وقتنا الحالي).
و هذه المقالة مخصصة للناس المعطاءة... الناس اللي بتدي من غير حساب، اللي بتحب من قلبها، اللي بتفكر في التاني قبل ما تفكر في نفسها، اللي بتيجي على روحها علشان الأخر، اللي سعادتها من سعادة اللي معاها، و راحتها من راحته فعلياً مش كلام، الناس اللي مش واخدين الانسان دة سلم و لا فترة و تروح لحالها، الناس اللي شايفينه مش علشان معاه فلوس او ليه مركز، الناس اللي للاسف يا حرام جعلت من حد مركز دوران حياتها... الناس اللي حبت و خلاص.
فلنبدأ:
- وقف نهر العطاء الخالد اللي انت فاتحه سبيل لحد انت عارف انه بيدي حد تاني كتير و كتير اوي... بس هو شايف انك انت راضي بقليلك، فبيديك قليل، سواء وقت، اهتمام، حب، دعم، ماديات، انت بالنسباله: قليل.
- اوعى تكبر حد عليك، على قولة اصالة: كبرتك على سيدك، و دة اللي بيحصل فعلاً، اول حد بيكبر عليه انت، عند و تكبر و رفض... بيشوف نفسه يستاهل احسن منك... مع انه قبلك كان تايه جوا روحه.
- اوعى تفتكر انه هيحبك زي ما بتحبه، او انه هيخرج برة طريق حياته علشانك. هوا لو فاضي هيجيلك، بس مش هيفضي نفسه علشانك، مش هيبوظ نظامه علشانك.
- اوعى ثم اوعى تخطي خطوة زيادة عن اللي هو بيعملهالك، ليه تدي زيادة و هو عنده القدرة يدي، بس مش عايز يديك.
- اوعى تفتكر انك لو تجرأت و ابتديت تطلب زيادة عن القليل اللي بتاخده منه هيديك عادي كدة، لا حضرتك، دة من جوا هيرفض، علشان رضوخك و قبولك بالقليل من الاول بقى حق مكتسب بالنسباله، و غير كدة يبقى على رأي مشاهير التك توك: انت تغيرت، مبيقتش تحبني.
- اوعى تفتكر انك لو تغيرت ( و دة حدث بشري طبيعي) انه هيقبلك، في حين انت قبلانه بكل تغيراته، بالعكس دة هيرفضك تماماً. علشان هوا واخدك تكمل حاجات عنده، لو مكملتهاش يبقى ملكش لازمة.
- اوعى تعتقد و الا يوزك عقلك تظن ان دي علاقة كاملة الاركان، حضرتك موجود بشكل جزئي، هو بياخد منك حاجات تكمله، مش عايزك كلك.... انت هتوجع دماغه ليه.
- اوعى تفكر و لو لفيمتو ثانية انك مهم عنده! لا! من الأخر الناس اللي تهمه هوا بيقدرهم و بيعملهم حساب لكن انت بالنسبة له لا مؤاخذة ( هفأ).
- اوعى تبينله ضعفك او احتياجك ( سواء نفسي او عاطفي او مادي) هيبتدي يشوفك قليل، يبتدي يشوف نفسه و التانيين اعلى و احسن منك.
- و اوعى تسرح بخيالك انه هيقدرلك اي حاجة انت عملتهاله، او ضحيت بيها علشانه، اول رد هيتقالك، انت اديت بارادتك انا مغصبتكش أو متفقناش على كدة.
- و يادي الهنا لو انت اتجننت لا قدر الله، و طلبت تعرف مكانك عنده، او يحسسك بالاطمئنان في العلاقة دي. سبحان الله هتحس نفسك قاعد في اجتماع شغل و طريقة كلام عملية بحتة لم تسمعها منه من قبل ( صوت العقل المنطقي اللا منطقي اشتغل).
- و يا حلاوة يا ولاد لو اشتكيتله قلة اهتمامه بيك، ماسورة حجج لولبية النزعة بتطفح على الحوار: الشغل، الارتباطات العائلية، الصحاب، مليش موود، كلهم اولية عنك.
- و اوعى تفكر ترفض انك مش اولية في سلم الاولويات السابق، انت اتهبلت!!!ازاي تعترض على هكذا ترتيب. هو يحطك مكان مهو عايز، ان شاء الله لو حطك بعد الأخير، انت ترفع ايديك للسما حمداً و شكراً.
- و على الله، على الله تتهور و تتخانق، احب اقولك مع اول خناقة هو بيتخض، عايزك دايما مسالم لطيف، و خلاص بيحطك في مكان معين مبيحبوش و مش عايزه ... لست ذو اهمية عنده.
- ثم اوعى و دي اهم اوعى: اوعى تأمن و تطمن، لأن اللي زي الناس دي أمانك و اطمئنانك و راحتك ليس ذو اهمية بأي شكل عندهم.
نيجي للسبب:
للأسف الشديد جداً، السبب حضرتك...
- للأسف طول ما انت مبتحبش نفسك، محدش هيحبك.
- طول ما انت مش مِغَّلِي ( من غلاء، يغلو) نفسك محدش هيغليك.
- طول ما انت مبترسمش حدود لعطائك محدش هيديك.
- طول ما انت مستني من حد حاجة هتفضل تعبان و مش كامل من جوا.
- طول ما انت مش مقدر قيمة اللي ربنا ادهولك في صورتك انت مش هتلاقي قيمتك عند حد.
- طول ما انت بتلاقي راحتك في راحة غيرك هتفضل تعبان طول عمرك.
- طول ما انت لسا بتزعل ، و بتزعل اوي، من ناس اشتريتها و باعتك، يبقى انت لسا مشوفتش الحقيقة.
- طول ما انت بتدي و مبتستناش، هييجي يوم تحتاج و متلاقيش.
- طول ما انت ساكت على حقك، فانت شيطانك الاخرس.
- طول ما انت مبتسمعش لاحساسك الداخلي بان دة غلط و بتلغيه علشان مشاعرك، علشان الظروف، علشان المجتمع، هتفضل تدوق الوجع مع كل فنجان قهوة و كوباية شاي كل يوم، كل يوم الصبح عالريق.
- طول ما بتدي فرصة تانية لناس خسروا حق الفرصة من اول مرة، هتتشرخ مع كل فرصة، فبلاش احسن.
- طول ما انت شايفهم حاجة كبيرة اوي، و نسيت انهم بشر، و البشر فيهم انانية، هتفضل تتكسر لغاية ما تبقى ذرة غبار، لا ليك وزن و لا قيمة ( مجازاً علشان علمياً هي ليها طبعاً).
وقف نفسك عند حدها..... ربنا خلقك ليك قيمة و قيمة كبيرة اوي، مفيش حد على وجه البسيطة يستاهل انك تقلل من العظمة دي علشانه.
حب نفسك يا افندم.
اشتري نفسك يا افندم.
دور على سعادتك يا افندم.
انت مش شغال وظيفة جزئية في حياة حد يا افندم.
الانانية الوسطية مش عيب يا افندم.
حط ماسك الاكسجين على وشك الاول علشان تقدر تساعد نفسك و غيرك يا افندم.
دور على راحة بالك الاول قبل اي حد يا افندم.
اتعلم متستناش طبطبة من حد يا افندم.
من حقك تكون رقم واحد في حياة اللي عايز تكمل معاه يا افندم.
اتعلم تقول لنفسك لأ يا افندم..... لأ يا افندم.
شكراً
آخر الكلام:
"إذا شككت في مودة إنسان فاسأل قلبك عنه، سلوا القلوب عن المودات فإنها شواهد لا
تقبل الرِشا."
( علي بن أبي طالب) كرم الله وجهه
الرشا: جمع رشوة.

الحب
العطاء
الخلافات
المشاكل
الموضوعات المتعلقة
حكاية الليمونة
الخميس، 16 يوليه 2020 02:36 م
الأبناء لا يتقبلون ال خلاص
الخميس، 18 يونيو 2020 01:20 م
العين.. شين.. ميم اللي مودينا في داهية
الخميس، 11 يونيو 2020 07:39 م
عيد ميلادى فى الكورونا
الثلاثاء، 02 يونيو 2020 02:54 م