دموع الشوارع

يا شوارع يا ميادين = قولى الخاين فيكى مين
مين المخلص فيكى حقيقى = ومين الواخد بالملايين
مين معاه النيه عمار = ومين الشر فى قلبه دفين
مين بيرش الحزن علينا = رغم الحبس وهوا سجين
لسا ديولهم قاعده بتلعب = جوا جحور بسموم تعابين
اصحى ياشارع قومى يا بيوت = اوعوا الفتنه بنينا تفوت
لمَا الشعب يعيش الفرقة = يلقى الحلم معاه بيموت
جوا بره فيه أشرار = عايزه بلدنا ما فيها القوت
يا شوارع يا طريق = مين بيضحى بدم شقيق
مين الجاى يكسر بخاطرنا = ونفسه بلدنا تخش غريق
مين بيزرع خير ومحبه = ومين بيلهلب فيكى حريق
اوعوا فلول الغدر تبان = تنشر فوضى بألف فريق
لو جه حابل ويَّا النابل = تبقى الثوره ماليها بريق
يا شوارع يا حارات = مين البايع فيكى شعارات
مين بيفكفك لينا صفوفنا = ومين بيرفع صوت نعرات
يا شوارع يا مدارس = جيشك صاين عهدك حارس
أحسن جند الله فى الأرض = وقال دا شهيدك هوا الفارس
ليه الكل صبح يتفلسف = عامل نفسه بس الدارس
واللى جاى زى الحربايه = وكان لكل الكدب يمارس
مين بيغازل حلم حياتنا = وجايب خنجر فينا وغارس
يا شوارع يا ميادين = قولى الخاين فيكى مين