صرخة

ياكُلْ أّهل البلد ياخيٍر جنود الأرض
مصر النهارده ف خطر والظرف قام يشتّد
سايق عليكوا النبى حبوا البلد دى بجد
واللى يخاف عالبلد لازم يُقف ويصُد
مش ناقصه هى الفتن مش ناقصه نخسر حد
دا الفتنه لو سيطرت كل البلد تنهد
مش عاوزه نار الخطب واللا الخطاب يحتّد
وإشاعه تملى البلد إٍلحَق ! دا قاموا الحد
وفلانه جت عندنا وفلانه ردْت رد
والنار تقيد ف البلد والأزمه راح تشتد
والكل راح ينْكوى ويعُض إيده عض
ونضيع قوام كلٍنا والحُر يرجع عَبْد
والخيط يضٍيع مننا لما الطريق ينسد
والشمس تغرب هنا وتضيق علينا الأرض
وننول غضب ربنا ونشوف وجوه تٍسوّد
وتفيض دموع الندم مايحوشها أكبر سد
إيه العمل يابلد ؟ واحد يقوللى الرد
دا احنا اللى شفنا الشّقَى وانداس كمان عالخد
والجوع قسم ضهرنا وانهّد حيلنا هد
واما أذن ربنا إن الكيَان ينرّدْ
ناكل كده ف بعضنا واللى انبنى ينهد
عاوزين نشوف شغلنا عاوزين نرّبى الولد
ناخد بيّد الوطن ونمد إيدنا مد
واللا بإيدينا البلد ترجع لحكم الفرد!
يارب صون مصرنا من كل ظالم وغد
وارحمنا من نفسنا وازرع مابيننّا الود