فيديو..شريف منير يحسم الجدل: أقسم بالله العظيم ما رحنا فندق المنتخب ولا نعرف اللعيبة فين.. قبلت العرض كقوى ناعمة مهمتنا ندعم بلدنا.. لم نتقاض مليما من الشركة الراعية.. وربما توقيت الفيديو الأول كان خاطئا

فى الوقت الذى كثر فيه الحديث والجدل عن سفر الفنانين لتشجيع المنتخب فى روسيا، أكد الفنان شريف منير، احترامه لعمله وفنه، واعتزازه وحبه لوطنه مصر، مشددا فى الوقت ذاته على قبوله أى دعوة لمساندة وتشجيع المنتخب المصرى مستقبلا.
ورفض الفنان شريف منير خلال مداخلة هاتفية لبرنامج "على مسؤوليتى"، للإعلامى أحمد موسى، والمذاع على قناة صدى البلد، الربط بين ما حدث فى أم درمان وما حدث فى كأس العالم، قائلا: "ربنا وحده هو اللى بيحكم، لو كنا كسبنا وهيصنا مش كانوا هيقولوا علينا وشنا حلو، ولما الأرجنتين خسرت كان وشنا وحش برضه".
وقال "منير"، نتيجة الفيديو أظهرت حاجات كتير مكنتش متخيلها، وحالة من الغليان ظهرت على الصفحات، بقولهم اهدوا ، أنا طول عمرى بحترم شغلى وفنى وبلدى وهفضل احترمها طول عمرى، وآخر ما كنت أتوقعه إننا نتهاجم بهذا الشكل وبالألفاظ الخارجة بالأب والأم، وهتك الأعراض، وحاجة فى منتهى القسوة".
وتابع: "أنا طول عمرى معروف بينى وبين الناس إنى محترم وبحترم نفسى وولادى بيحترمونى، ومربى ولادى على كده، ولما اتكلمت يمكن يكون خاننى التوقيت،إنى أتكلم والناس مضايقة، ويمكن يكون توقيت الفيديو مش حلو، إنما أنا اتكلمت من كتر الهجوم، إحنا مش فى موقف دفاع، إحنا قوى ناعمة، إحنا مش بنعمل حاجة غلط، أنا بفسر، إنما مقتنع باللى حصل كله ومش ندمان عليه، ومش مضايق منه، وشاركت وعملت اللى جوايا، وأنا مش بدافع عن نفسى، أنا عملت حاجة بتحصل فى الوسط الفنى من قديم الأزل، أى دعوة تروح لأى فنان بيقى تذكرة الطيران من الشركة وبإقامته، ده الطبيعى لأنه بيمثل البلد، ده سفير".
الواجب الوطنى هو الددافع لقبول العرض
وكشف الفنان شريف منير، عن رفضه العرض الذى قدمته الشركة الراعية لمنتخب مصر لكرة القدم، للسفر إلى روسيا، مرتين، مؤكدا أن الواجب الوطنى هو الذى دفعه لقبول العرض فى المرة الثالثة، قائلا: الواجب الوطنى هو الذى دفعنى لقبول العرض فى المرة الثالثة".
وقال شريف منير للإعلامى أحمد موسى، والمذاع على قناة صدى البلد، "كنت عامل حسابى اتفرج على الماتشات فى مصر، بس أنا اعتذرت فى أول عرض ليا من الشركة، وبعد إلحاح واعتذار مرتين حصل إصرار إنى لازم أطلع، وبعد الإصرار مقدرتش أقول لأ، وحسيت إن ده واجب لازم أعمله، وأنا راجل وفى ومخلص ومعروف عنى إنى مخلص لمصر وبحب تراب الأرض دى".
لم نأخذ أموالا من الشركة الراعية
وبسؤاله عن تقاضيه مبالغ مالية مقابل السفر إلى روسيا وارتدائه تيشيرت المنتخب: قال "منير"، "لما بلبس الفانلة بتاعة المنتخب وعليها علامة شركة من الشركات وأنا لابسها كفنان معروف أنا كده بعمل دعاية والحاجات دى بيبقى عليها اتفاقات زى لعيبة الكورة، وفى بلاد بره أى لوجو محطوط على فانلته واخد تمنه بأى شكل، لأنه ده الطبيعى وده العادى، وفيه ناس لطيفة قالت انت كنت عاوز تاخد فلوس كمان، إحنا مش بناخد فلوس، إحنا رايحين عن طريق التنقل والإقامة 3 أيام ، وماخدناش من الشركة الراعية حاجة، أنا خدت تذكرة علشان أشجع الفريق القومى وقلبنا كله كان معاه، فيه أرقام بسمعها على السفرية، إن كل واخد 80 ألف دولار تكلفة كل واحد سافر".
لا نعرف مكان إقامة الفريق حتى نحضر للفندق
وتابع شريف منير: "لما كنا فى المطار كان فيه كورنر لمحل حلويات شهير عامل تورتاية كبيرة بصورة محمد صلاح وصورة المنتخب، اتاخد الجزء ده واتقال احنا روحنا للعيبة، وأقسم بالله العلى العظيم إحنا لا نعرف اللعيبة كانوا ساكنين فين ولا فندقهم فين، ولا سألنا عليهم أساسا لأننا ناس بنفهم، أنا لما بكون فى مسرح محدش ييجى يقعد معايا لأنى لازم أركز وهو عنده ماتش لازم ينام بدرى، ولازم يبقى هادى الأعصاب ومفيش حاجة تشغله".
وأبدى الفنان استغرابه الشديد من الإهانة التى صدرت من البعض فى الوقت الذى يتسابق فيه هؤلاء للتصوير معه قائلا: "الغريب فى الموضوع بقى إن الناس اللى بتشتمك وتهينك دى لما بيقابلوك بيبقوا عاوزين يتصوروا معاك، وعمرى ماقلت لحد لآ، لأن لما بخرج من بيتى أنا ملك الناس اللى عاوز يتصور معايا، أنا تحت أمره لأنى مهنتى بتفرض عليا كده، وكتير من زمايلى بيقولوا أنت عندك صبرك، وعمرى مابكسف حد ولا بضايق حد، ولكن لما يتقال علينا إن وشنا وحش، طيب وحش ليه بدليل إيه؟.. مالناش قاعدة جماهيرية مثلا؟.. أو مابننجحش فى أعمالنا".

واتهم "منير" بعض الصفحات بتعمد إساءتها للفنانين الذين سافروا إلى روسيا من أجل تشجيع المنتخب ومؤازرته، مضيفا: "اكتشفت ان الناس اللى بتشتم لما بخوش على صفحاتها على الفيس بوك لقيت الصفحة فاضية فده معناه ان الناس دى منظمة بتعمل كتيبة بتهاجم فى اللحظة دى علشان تعمل مشاكل"
خلوا بالكم فيه فتن
وفى نهاية مداخلته وجه الفنان شريف منير كلمة للمصريين قال فيها: "عاوز أقول حاجة عامة للمصريين إن السخونة على صفحات السوشيال غير طبيعية والدنيا سخنت قوى.. خلوا بالكم فيه فتن بتتعمل وتسخن ناس علشان خاطر الدنيا تتهز، وخلينا واخدين بالنا إن فيه لحظات يعتقدها الآخر إنها نقطة ضعف يقدر يخش منها، ويجب ألا ننساق وراء هذه الأخبار، لأن المقصود حاجات مش كويسة، وفيه استهداف للبلد وناخد بالنا".
واختتم شريف منير تصريحاته موضحا:، "أنا علشان حبى فى الوطن والمنتخب قلت هالبس الفانلة، بس مش هاخد حاجة، وده اللى بلا مقابل".