يا عم الحاكم

يا ما قولتلك يا عم الحاكم
مش معنى إنى أكون محكوم
أبقى إنسان مكسور وضعيف
وأنت سايق فيها بغرور
لا حاسبت ظالم لا نصفت يوم مظلوم
كأنك يا عم كفيف
***
شربت كاسات مرك سنين
وكل ما شرب كاس مر
أقول يا واد خليك أصيل
سامح كمان المردي
صفى قلبك وعيش راضي
أتريك حاكم عويل
***
طال ظلمك كل شىء
حتى الأراضي
بارت وأنت راضي
وجفنك كان يغمض
رغم أنك جلاد كبير
من غير قانون ولا قاضى
***
المر عمال يزيد
لحد الكيل ما طفح
وكلمنا بقى شيء مكرر
وإنت بطبعك عنيد
بتكره كلمة فرح
وهمك تتشرط وتتآمر
***
كيفك تسقينا ويل
وتوهم الدنيا بفرحتنا
فى أفلام شرخت صورتنا
ظاهرها برواز جميل
شعارها حريتنا
باطنها مؤامرة على خبتنا
***
يا عم الحاكم قولتلك
جرب تعيش محكوم
جرب تعيش مظلوم
أنزل وسيب منزلك
أسكن فى يوم بدروم
أشرب من الخرطوم
***
يا عم الحاكم قولتلك
فى ميت جريدة وميت مجلة
حكومتك هدمت أمالنا
لا كلامى يوم زلزلك
وكأن هدفك المهانة والمذلة
يكونوا فى عهدك مستقبلنا
***
يا عم الحاكم قولتلك
احذر راح يجيلك يوم
والشعب راح يبهدلك
غرورك قالك هنحنلك
ورافض تصدق يوم
سجان فى سجن يسلسلك
***
تفهت شباب المحروسة
وقولت حبة عيال
والكبر والغرور غشك
أتارى المحروسة دى محروسة
وعيالها أعظم رجال
فى ساعات قدرت تهشك
***