مينا جميل يكتب : إدمانك

وملوهش حلول
غير تبقى معايا وماتسيبينيش
أنا مدمن لجميع تفاصيلك
طب ينفع من غير دمى أعيش !؟
وعلاجى كمان منك فيكى
انا قلبى مباعش على فكره .. ولسه شاريكي
وبقيتى جينات من تكوينى
وانا قلبى بدونك يكوينى
انا كنت بموت ف اللى بايعنى
دلوقتى ببيع ف اللى شارينى
كله عشانك..
أرجوكى تعالى إستلمينى
واتبنى الحالة وعالجينى
انا حد كتير ميئوس منه
وعلاجه ف قربك منه كتير
ومشاعر منك ترويني..
العمر لحظة لقا وسنين كتيرة فراق
شرايين قلوب عشاق ليها الفرح مشتاق
قلبى طريق مفتوح والكل بيعدى
ساعة م ييجى يدق بضرب على يدى
انا كنت خايف منها معرفش ليه ؟
انا كنت خايف احبها طب فيها ايه !
وييجى الليل وافكر ف اللى كان بيننا
ساعاات تجرى وساعة م افتكرها تموت
كأن الوقت من غيرها
بيحلف إنه مش هيفوت
كأنه تابوت بيخنق فيا أنفاسى
أنا حنين أكيد جدا..وشايفانى كتير قاسي
بدون م أسمع كلام منك ولا تأنيب
بشوف قلبك بإحساسى
ف ليه البعد !
وعمرك جاى ومتفصل على قدي
ولو كان الطريق مسدود
معاكى بإيدى هنعدي
مانيش عارف بقيت خايف عشان بعدك
ولا خايف عشان أصلا هموت العمر من بعدك
وبرجع تانى للتفكير وبسرح فيها وبضحكة بطعم دموع
عشان الفرح ف بعادك بقى ممنوع
غروب وهروب سكاات مسافات
كل الطرق متشتته
كل الحلول متفتته
كل الوعود متبخره
والدنيا جايبانا لورا
طب ايه هنعمل ياتري!؟
صار الغياب دستور لكل العاشقين
وإشمعنا يعنى قلبك انت يكون حصين
هو انت ليه تفرح وماتكونش حزين
هو انت مين!!
وازاى هتسكن قلبها
هو انت اصلا كنت يوم واخد ل بالك منها
حتى اللى كان بينكم اكيد.. كله انتهى من عندها.. ومن عندها

حاول كتير تقرب منها
خليها تتمنى اللقا خليها تتمناك تغير
أدمنتها .. طيب هى ليه مابتدمنكش !
فرحتها .. كده م الطبيعى ماتخسركش
طمنتها .. طب ليه بعيد راحت م جاتش
دلعتها .. ومحيت بايدك دمعها
فسحتها وخرجتها واديتها رأى ف لبسها
طب كنت فرح ف حزنها..
لو حستك
طب ليه هتبعد وانت ليها فرحها
طب ليه هتبعد وانت حته منها
طب ليه هتبعد لو لسه بينكم شئ..
ولا ضاع ف لحظه ولا انتهي! ؟
غربة قلوب مرمية من دون السؤال
مختومة بالختم المحال
وهتعمل ايه وازاى وليه.. شككتها
ضيعت منها كل حاجه حلوة ليك
مبقتش بتصدق عنيك ..بتخاف عليك
متحس يآخى أبوس ايديك
خليك مكانها وحس باللى عملته فيها
بالرعشه لما بتخسرك من بين ايديها
بالحضن لما بتبعدك.. ياتقيل عليها
شوف اللى فات .. والذكريات
حاول تصلحهم بقا حاول تغير كل تقاليد اللقا
انسى الدموع خليك قوووى إنشف ياواد بقى وإستوى
خليك سند خليك شجاع وإنسى الكآبه والضياع
خليك عشان توصلها زى الشراع
حاول بقدر المستطاااع
انك تكون عاشق ولا تعرف تخون
حاول تخرج كل حاجه حلوه فيها
م العيووون
وبحضن دافى جوه منك ضمها
هديها وقت الخوف وقت القلق م الجاى
فضفض معاها وهاتلها حمص وشاى
خليها دايما تدمنك خايها فاكراك
لو مهما هتغيب عنها تبقالها حاضر
أول م تطلب تبقى دايما عندها
أول م تطلب تبقى جاى