هاجم الإعلامى عمرو أديب، مكرم محمد أحمد، رئيس المجلس الأعلى لتنظيم الإعلام، بسبب عدم خروج أى بيانات بخصوص قائمة ال50 عالما أزهريا الذين لهم الحق الفتوى عبر وسائل الإعلام المختلفة للتوضيح، وتابع ساخرا: "أتحدى أى حد فى مصر فاهم حاجة عن الموضوع ده". وقال أديب، ببرنامج "كل يوم" المذاع عبر فضائية ON E: "أتحدى إن تصريح واحد واضح بخصوص الكلام ده.. تروح تتكلم مع الأزهر يقولك ده المجلس الأعلى للإعلام.. نروح للمجلس الأعلى للإعلام يقولك أنا مالى ده الأزهر.. ما تطلعولنا بيان رسمى للقنوات.. وهل هذا تصرف جيد لناس عاوزة تنظيم الفتوى فى مصر.. ما تكونوا شجعان وقولوا أيوة احنا عملنا كدة وخلاص اتحمل المسئولية.. لكن ماحدش عاوز يتحمل مسئولية القرار.. لا الأستاذ مكرم ولا الأزهر.. ما تقولولنا إن انتو قررتوا إنها تبقى زى الملالى فى إيران، إنه يبقى فيه شيخ واحد هو اللى يقول ويعمل وكلنا هنرجعله وخلاص".
واستكمل أديب: "مكرم مرضيش يدخل معايا على التليفون علشان أنا بهاجمه.. إزاى الراجل المسئول عن الإعلام يضايق إن فى حد بيهاجمه.. طب أنا ههاجمك على طول إيه رأيك.. أنا لا بخاف ولا بقلق وابقى وقف البرنامج خلينا نقعد فى البيت ونستريح بما إنك ناوى تسكت الناس كلها.. أنا مش عاوزك ترد عليا ولا تتكلم معايا بس طلع قرار شجاع واضح أن هؤلاء هم الخمسين اسم اللى موافق عليهم".
وأردف قائلًا: "اللستة اللى مقدمها الأزهر فيها ناس خريجى تجارة.. ونصهم موقفش قدام كاميرا قبل كدة.. أجيبهم يشتغلوا إزاى؟ الموجود على رأس جهاز تنظيم الإعلام علشان ينظمه مش يقفله.. حضرتك مش لازم تتعالى إن أنا هاجمتك لأنى هاجمتك على قرار مش على شخصك، ولو حضرتك ماعندش القدرة أن تفرق بين الآراء وأنك تدخل فى حوارات مع أحد يبقى حضرتك لا تصلح أن تكون مسئولا عن تنظيم الإعلام.. أنا مابخفش والأرزاق على الله.. وكل اللى أنا عاوزه بيان بأسماء الناس المنوطة بالفتوى.. والأستاذ مكرم على فكرة مش بيعاقب غير اللى على مزاجه.. لأن كان عنده حاجات ينفع يعاقب عليها ومعاقبش.. ولا أتكلم أكتر؟.. والبلد دى مش بتاعة واحد دى بتاعتنا كلنا وأنا مش بدافع عن الفوضى.. وأنا قلت رأيى وزى ما يحصل".
